Ómerkileg, óheiðarleg og staðlaus fullyrðing aðstoðarritstjóra

"Ég er reyndar enn með ónot yfir því að nokkur blaðamaður yfirleitt geti skrifað leiðara á borð við þann sem Jón Kaldal birti í Fréttablaðinu á laugardaginn var," segir Páll Magnússon fréttastjóri Stöðvar 2 í grein sem birtist í Fréttablaðinu og hér á Vísi í dag. Páll segir Jón Kaldal þverbrjóta siðareglur BÍ með því sem hann kallar ómerkilega, óheiðarlega og staðlausa fullyrðingu um vinnubrögð fréttamanna Stöðvar 2. Jón Kaldal skrifaði harðorðan leiðara í Fréttablaðið á laugardag vegna framgöngu fréttamanna Stöðvar 2 á Reykjavíkurflugvelli við komu Bobbys Fischers. Jón sagði að fréttastofa Stöðvar 2 hefði "sölsað undir sig komu Bobby Fischer til Íslands og ekki aðeins ýtt til hliðar öðrum fjölmiðlum heldur einnig þeim mönnum sem hafa lagt á sig mikla vinnu til þess að fá Fischer lausan úr varðhaldi í Japan og greiða götu hans hingað til lands." Þá sagði í leiðaranum að framkoma fréttamanna Stöðvar 2 í beinni útsendingu fréttastofunnar hefði verið þeim til minnkunnar og hljóti að vera klárt brot á 1. grein siðareglna BÍ. Þátt fréttastjóra Stöðvar sagði Jón Kaldal kapítula útaf fyrir sig. Páll Magnússon svarar Jóni fullum hálsi í grein sinni. "Eftir að hafa tekið uppspuna Einars S. Einarssonar, um gang mála við komu Bobbys Fischers til landsins, góðan og gildan - þrátt fyrir að hann hafi verið marghrakinn af öllum sem til þekktu - heldur Jón Kaldal því fram án rökstuðnings, að tiltekinn fréttamaður Stöðvar 2 hafi logið að áhorfendum. Nú ég veit með fullri vissu að það gerði fréttamaðurinn auðvitað ekki. Eftir stendur þessi ómerkilega, óheiðarlega og staðlausa fullyrðing Jóns Kaldals, sem sjálf þverbrýtur einmitt þá 1.grein siðareglna Blaðamannafélagsins, sem vitnað er til í leiðaranum," segir Páll m.a. og vísar á bug öllum fullyrðingum um óeðlileg afskipti af móttökuathöfn Bobbys Fischers og einnig því að Stöð 2 hafi nýtt sér kostun Baugs á einkaþotu undir Fischer, til að skapa sér forskot á frétt. "En úr því að Jón Kaldal er svona beyglaður af þessu eignarhaldi verður hann að upplýsa lesendur Fréttablaðsins um hvaða áhrif það hefur á umgengni og umfjöllun blaðsins um Baug. Er hún meiri eða minni? Jákvæðari eða neikvæðari? Satt best að segja finnst mér að Jón Kaldal ætti af umhyggju fyrir sjálfsmynd sinni sem blaðamaður að reyna að gleyma því sem fyrst að hafa skrifað þennan leiðara. Svo ætti Jón að sjá sóma sinn í því að biðja fyrrnefndan fréttamann afsökunar á að hafa vænt hann um lygi. Ég reikna hins vegar ekki með því að Jón Kaldal geri það - og hafi hann þá skömm fyrir," segir Páll í grein sinni. Hér má lesa grein Páls Magnússonar í heild sinni.Leiðari Jóns Kaldal í Fréttablaðinu 26.mars