Portami via síðasta Skífuskífan

Síðasta platan sem kom út á vegum hinnar fornfrægu hljómplötuútgáfu Skífunnar var Portami via með Kristjáni Jóhannssyni. Í takt við almennar nafnabreytingar á fyrirtækjum hefur Skífunafnið verið aflagt og önnur tekin upp í staðinn. Móðurfyrirtækið heitir nú Dagur Group en afþreyingarsviðið Sena. Fyrsta platan undir merkjum Senu kom út í síðustu viku og geymir tónlistina úr barnasöngleiknum Ávaxtakörfunni. Skífunafnið er þó ekki aflagt með öllu, þrjár verslanir í eigu Dags Group munu áfram heita Skífan. Eiði Arnarssyni, útgáfustjóra íslenskrar tónlistar hjá Senu, telst til að um 315 plötur hafi komið út undir Skífumerkinu á þeim 22 árum sem liðin eru frá stofnun þess. Sú fyrsta var með listamanni sem nefndi sig Nicole en Eiður kann ekki nánari deili á þeirri ágætu konu. Poratmi via féll í heldur grýttan jarðveg gagnrýnenda sem sögðu Kristján langt frá sínu besta. Verður hennar því varla minnst sem tónlistarlegu afreki en hugsanlega sem síðustu plötunni sem kom út undir merki Skífunnar.