Bíldudalslögin hrönnuðust inn

"Þetta lofar mjög góðu, lögin hafa hrannast inn," segir Pétur Bjarnason, Bílddælingur og framkvæmdastjóri SÍBS, en hann er formaður dómnefndar lagasamkeppni sem Arnfirðingar efna til í tengslum við sumarhátíðina Bíldudals grænar. Skilafrestur rann út í gær og kemur dómnefndin saman til fyrsta fundar í dag til að fara yfir lögin. Góð þátttaka kemur Pétri ekki á óvart enda sveitungar hans músíkalskir með eindæmum, líkt og hann sjálfur. "Þetta er mjög tónelskt samfélag og annar hver maður, og jafnvel meira, spilar eða syngur." Þegar Bíldudals grænar voru haldnar fyrir tveimur árum var tónlistin í hávegum höfð og margir dustuðu rykið af hljóðfærunum. "Þá voru uppvaktar sex eða sjö hljómsveitir sem höfðu starfað fyrir vestan og á vísnakvöldi komu fram á milli 30 og 40 manns." Sjálfur var Pétur í bransanum, lék á bassa með þeirri landskunnu stuðsveit Facon frá Bíldudal þar sem söngvarinn Jón Kr. fór fremstur í flokki. "Ég var settur á bassann tveimur dögum fyrir ball á sínum tíma og hafði ekki séð svoleiðis hljóðfæri nema úr tíu metra fjarlægð en kunni aðeins á gítar," rifjar Pétur upp. "Það gerði sig samt, menn voru ekki kröfuharðari en þetta." Fyrir tveimur árum kom Facon saman á nýjan leik og Pétur útilokar ekki að slíkt gerist aftur í sumar. "Það er hugsanlegt að við reynum að rifja eitthvað upp." Mikinn tónlistaráhuga Bílddælinga rekur Pétur til yfirskilvitlegra afla. "Það eru galdrar þarna og svo eru menn innblásnir af náttúrufegurðinni; fjöllum og fjörðum." Það kemur í ljós í byrjun maí hvaða lag verður einkennislag Bíldudals grænna þetta árið og víst að margir bíða spenntir.