Fá ekki að hækka útsvarsprósentuna

Sveitarfélögin fá ekki samþykki stjórnvalda til að hækka útsvarsprósentu á íbúa umfram 13,03 prósent. Um það hefur tekjustofnanefnd samið. Nefndin ræðir skiptingu tekna ríkisins og sveitarfélaga og verður niðurstaðan ljós á næstu dögum. Fjármálaráðherra og félagsmálaráðherra lögðu tilboð ríkisins í hendur tekjustofnanefndar á föstudag með þeim formerkjum að frekari fjármunir væru ekki á lausu hjá ráðuneytunum. Lúðvík Geirsson, bæjarstjóri Hafnarfjarðar, er ósáttur við tilboðið. Hugmyndir ráðherranna flokkist sem tímabundnar bráðabirgðalausnir þar sem ekki sé tekið á vanda sveitarfélaganna til frambúðar. "Mér finnst þessar viðræður við ríkið hafa verið mikil þrautarganga og skilningur þeirra á stöðu sveitarfélaganna engan veginn með eðlilegum hætti," segir Lúðvík. Skilyrði höfðu verið sett um að sveitarfélögin yrðu ekki rekin með 3,5 milljarða tapi líkt og árið 2003. Sveitarfélögin vildu leyfi stjórnvalda til að hækka þak útsvarsprósentunnar og eiga þannig möguleika á að auka tekjur sínar um 2,5 milljarða. Þau vildu einnig hlutdeild í veltusköttum svo sem tryggingargjaldi, bensíngjaldi og jafnvel virðisaukaskatti, sem þau hafa ekki haft hingað til. Af því verður ekki samkvæmt heimildum. Ríkið mun hins vegar greiða fasteignagjöld af eignum sínum sem hæst mun nema 600 milljónum árið 2008. Jöfnunarsjóður sveitarfélaganna fær einnig aukið vægi samkvæmt tilboði ríkisins. Guðjón Bragason, formaður tekjustofnanefndarinnar, segir töluvert hafa borið á milli kröfugerðar sveitarstjórnarmanna í nefndinni á fyrri stigum og því sem ríkið hafi boðið. Vonbrigði komi því ekki á óvart en séu misjöfn eftir flokkslínum. Lúðvík segir baráttu um aukinn hag sveitarfélaga hljóta að ná út fyrir þær. Rúm 71 prósent sveitarfélaga eða 72 af 101 fullnýta útsvarsprósentu sína, samkvæmt tölum Sambands íslenskra sveitarfélaga.