Harma orð Halldórs

Höfuðborgarsamtökin harma ummæli Halldórs Ásgrímssonar forsætisráðherra á stjórnmálafundi á Akureyri fyrir skömmu. Halldór sagði að flugvöllur yrði að vera í Vatnsmýrinni til frambúðar til að tryggja greiðar samgöngur landsbyggðarbúa við höfuðborgina. "Höfuðborgarsamtökin vekja athygli á því að formlega er Halldór Ásgrímsson forsætisráðherra allra Íslendinga, einnig þeirra 63%, sem búa á höfuðborgarsvæðinu," segir í tilkynningu frá samtökunum. "Með yfirlýsingu sinni gengur hann þó þvert gegn mikilverðustu hagsmunum höfuðborgarsamfélagsins og víkur þeim til hliðar, að því er virðist fyrir eigin hagsmuni og hagsmuni flokks síns."