Viðskiptahindranir til sölu!

Ríkisstjórnin er nú að selja rótgróið einokunarfyrirtæki, Símann. Þetta er öflugt félag sem staðið hefur af sér samkeppni á flestum sviðum. Lykillinn að því að standa af sér samkeppni felst í því að ráða grunnnetinu. Sá sem ræður yfir grunnnetinu getur beitt samkeppnisaðila margvíslegum viðskiptahindrunum. Síminn hefur óhikað beitt þeim viðskiptahindrunum sem yfirráð grunnnetsins bjóða upp á. Þetta hefur Póst- og fjarskiptastofnun staðfest. Og hvernig virka þessar viðskiptahindranir? Búum til lítið dæmi. Fjarskiptafélagið X hringir í sinn viðskiptastjóra hjá Símanum og óskar eftir að kaupa öflugt samband á Stöðvarfirði til að dreifa þar innanbæjar. Nú líða þrír mánuðir og Síminn svarar ekki. Aftur er hringt og erindið ítrekað. Kurteislega er beðist afsökunar á þessum drætti á málinu, það hafi eitthvað farið úrskeiðis. Starfsmaður Símans lofar að málið verði afgreitt hið fyrsta. Enn líða tveir mánuðir. Hringt er og spurt hvað þessu líði eiginlega. Þau bara skilja þetta ekki. Nú er svari lofað frá Símanum í lok vikunnar. Mánuður líður. Enn er hringt í Símann og nú er svari lofað á eftir. Tölvupóstur berst. Kostnaður á mánuði 467.000 án vsk. Stofngjald ríflega ein milljón. Bíddu! Þetta er einhver vitleysa. Ég er að tala um Stöðvarfjörð á Íslandi?Þau lofa að skoða þetta aðeins betur. Þetta er rétt hjá þér. Þetta er eitthvað skrítið. Hefurðu talað við heildsölu Símans? Nei, á ég að gera það? Já. Talað við heildsöluna. Næst í þá daginn eftir. Nei, þetta er ekki á okkar könnu, þetta er ekki heildsöluvara, er svarið. Aftur á byrjunarreit eftir ríflega sex mánaða bið. Hringt í Símann. Er hún við þarna sem ég talaði við um daginn? Nei, hún er komin í aðra deild. Þú verður að tala við nýja viðskiptastjórann. Ha? Það er sá fimmti á tæpu ári. Já, þú verður að tala við hann. Erindið er því næst borið upp við nýja viðskiptastjórann. Það tekur hálfan mánuð að fá svar. Niðurstaðan. Verð á mánuði er langt yfir því sem vænlegt getur talist fyrir utan vsk. Spurt er; getið þið gefið afslátt til Stöðvarfjarðar, þar sem þetta er eina leiðin þeirra. Nú stendur ekki á svari. Nei! Þvílíkt kjaftæði, hugsa ég, en það má ekki styggja skrímslið. Hef gert það og fékk að kenna á því. Síminn hefur möguleika á að beita viðskiptahindrunum og hefur gert það og mun gera það. Verði grunnnetið selt með Símanum er verið að selja hindranir, viðskiptahindranir. Það mun ekki verða friður á fjarskiptamarkaði verði grunnnetið selt með þessum hætti.