Vill fá konur í stjórn

Valgerður Sverrisdóttir, iðnaðar- og viðskiptaráðherra, hefur sent stjórnendum 80-90 helstu fyrirtækjanna bréf þar sem hún hvetur þá til að beita sér fyrir því að konur fái tækifæri í stjórn. Ráðherra útskýrir að þátttaka íslenskra kvenna í stjórn skráðra fyrirtækja sé minni hérlendis en í öðrum samanburðarlöndum. Aðeins tvær konur hafi verið í stjórn skráðra félaga hér í fyrra. Engin sérstök ástæða sé fyrir því hvers vegna íslenskar konur hafi ekki tekið sæti í stjórnum. "Ég vil beita mér fyrir því að íslensk fyrirtæki skoði möguleg tækifæri fyrir konur í stjórn þeirra og taki upp betri hætti. Þannig er hægt að benda á að í stað lagasetningar um þátttöku kvenna í stjórnum geti fyrirtækin sjálf tekið sig á í þessum efnum. Nú eru aðalfundir í vændum og hvet ég þig til þess að beita þér fyrir því að konur fái aukið tækifæri í stjórn," segir Valgerður í bréfinu. "Þetta eru vinsæl tilmæli. Með þessu er ég að hvetja til uppbyggilegrar umræðu um þessu mál. Það eru mikil fundahöld framundan og þess vegna sendi ég bréfið núna. Ég vonast til að það sé hægt að ná árangri án atbeina löggjafans," segir hún og vill ekki segja hvað gerist ef árangur verður ekki viðunandi. "Þetta er mitt útspil á þessum tímapunkti. Á vinsamlegum nótum bara." Ara Edwald, framkvæmdastjóra Samtaka atvinnulífsins, finnst allt í góðu lagi að ráðherra sendi svona bréf enda gefur hann sér að bréfið gefi ekki í skyn neitt boðhald heldur sé bara um einfalda hvatningu að ræða. "Það er öllum frjálst að reyna að hafa áhrif á þróun mála með slíkri hvatningu," segir hann. Rannveig Rist, forstjóri Ísal og stjórnarformaður Símans, telur allt í lagi að ráðherra hafi skoðun á þessu máli og hvetji til þess að konur fái sæti í stjórn. Jafnréttismálin séu að mörgu leyti á leið aftur á bak. Konur hafi menntun en séu ekki sýnilegar. Frammistaða kvenna almennt í samfélaginu ætti að duga þeim til að veljast í stjórn fyrirtækja.