Allir velkomnir í Ígulker

Það er kominn föstudagur og Fókus fylgir DV í dag að venju. Djammkortið er á sínum stað, það er viðtal við kallarnir.is, mestu hnakka landsins og þú getur fundið út hver þú ert með týpukerfi Fókus. Einnig er viðtal við Carmen Jóhannsdóttur sem rekur fatabúðina-plötubúðina-hárgreiðslustofuna Ígulker á Laugaveginum. Ein nýjasta búð miðbæjarins heitir Ígulker og er stödd á Laugavegi 60. Þar ræður ríkjum hin tvítuga, spænsk ættaða Carmen Jóhannsdóttir. Hún bjó í Barcelona og kynntist búðabransanum í gegnum vini sína. Carmen tók þá ákvörðun að demba sér sjálf í bransann, fór á námskeið, tók lán og stofnaði Ígulker. Hún sagði Fókus hvers fólk má vænta í búðinni. "Mig langaði alltaf að stofna fyrirtæki og búð. Ég bjó í Barcelona og kynntist þar fólki í þessum bransa. Þá stóðst ég ekki lengur mátið. Vildi innleiða annan anda í litlu Reykjavík," segir Carmen Jóhannsdóttir, eigandi Ígulkers við Laugaveg. Í búðinni eru seld föt, tónlist, skór, fylgihlutir og málverk. Einnig er von á spreybrúsum og tímaritum og bókum tengdum graffiti. Þá er vinkona Carmenar, Margo Róbertsdóttir, með hárgreiðslustofuna Sítt að aftan innst í búðinni. Fötin sem Carmen býður upp á eru bæði second-hand og nýleg merkjavara, flest frá Spáni. Eitt af þeim merkjum sem Carmen er hvað montnust af því að fá að selja heitir Hixsept Irregular. Það er fatamerki þriggja stjarna graffitiheimsins, Hex, Hept og Alex One. Þeir eru Frakkar en búa á Spáni. "Það er mjög vinsælt á Spáni. Þeir velja búðirnar sem selja merkið vandlega. Ígulker er fyrsta búðin á Norðurlöndum með merkið," segir Carmen. Afganginn af viðtalinu við Carmen er að finna í Fókus sem fylgir DV í dag.