Kjörsókn með besta móti

Tæplega fjögur þúsund sjálfstæðismenn höfðu greitt atkvæði í prófkjöri Sjálfstæðisflokksins í Reykjavík þegar kjörfundi lauk klukkan níu í gærkvöld. Kjörsókn fór vel af stað í morgun og útlit er fyrir að mun fleiri kjósi í prófkjörinu nú en fyrir fjórum árum.

Af þeim fjögur þúsund sem höfðu kosið í gær, höfðu eitt þúsund og tvö hundruð manns greitt atkvæði utan kjörfundar undanfarnar þrjár vikur. Í gær kusu svo tvö þúsund og átta hundruð manns. Þetta er um þriðjungi meiri kjörsókn en á sama tíma í síðasta prófkjöri flokksins í Reykjavík.

Alls eru nú meira en nítján þúsund manns á kjörskrá, enda hafa fjölmargir bæst í flokkinn undanfarna daga. Um þrjú þúsund manns hafa gengið í Sjálfstæðisflokkinn í aðdraganda prófkjörsins, sem sýnir vel hve hörð baráttan er. Frambjóðendurnir eru tuttugu og fjórir, en þeir sem kjósa geta raðað í níu sæti. Mesta spennan ríkir um efsta sætið, þar sem baráttan stendur á milli Vilhjálms Þ. Vilhjálmssonar, borgarfulltrúa og oddvita flokksins, og Gísla Marteins Baldurssonar. Í nokkrum skoðanakönnunum í aðdraganda prófkjörsins hefur mjög lítill munur mælst á þeim og flest bendir til að prófkjörið í dag verði eitt það jafnasta í sögu Sjálfstæðisflokksins.

Kjörfundur opnaði aftur klukkan tíu í morgun og fjölmargir höfðu kosið nú fyrir hádegið, þó að engar tölur liggi fyrir. Starfsmenn Sjálfstæðisflokksins sem fréttastofan ræddi við í morgun sögðust gera ráð fyrir að minnst tíu þúsund manns myndu kjósa í prófkjörinu í dag. Síðast kusu rétt rúmlega sjö þúsund manns í pr´fokjöri flokksins í Reykjavík, svo það bendir flest til að kjörsóknin verði miklu meiri nú.

Kjörstaðirnir eru á sjö stöðum í borginni, meðal annars í Valhöll, höfuðstöðvum Sjálfstæðisflokksins. Þeim lokar klukkan sex og þá verða fyrstu tölur birtar. Síðan er gert ráð fyrir að tölurnar verði birtar á hálftíma fresti fram eftir kvöldi, en hugsanlega oftar ef ástæða þykir til. Endanlegar tölur ættu svo að liggja fyrir seint í kvöld.