Breytir engu um kjarasamninga

Vísitala neysluverðs lækkaði um 0,2 prósent milli október og nóvembermánaðar. Verðbólgan hefur því lækkað úr 4,6 prósentum í 4,2 prósent. Þetta er lítil breyting, þó hún sé meiri en búist hafði verið við. Áfram er búist við að Seðlabankinn hækki stýrivexti um 0,5 eða 0,75 prósentustig við útgáfu Peningamála í byrjun desember.

Ingvar Arnarson, sérfræðingur í greiningardeild Íslandsbanka, segir að almennt hafi verið gert ráð fyrir 0,1 til 0,2 prósenta hækkun verðbólgunnar. Spáskekkjan hjá Íslandsbanka stafi af því að verð á dagvöru hafi lækkað milli mánaða, verð á nýjum bíl hafi lækkað meira en reiknað hafi verið með og eldsneytisverð hafi sömuleiðis lækkað. Þá hafi íbúðaverð haldið áfram að hækka.

Grétar Þorsteinsson, forseti ASÍ, segir að lægri verðbólga hafi engin áhrif á viðræður vegna kjarasamninga. "Það er út af fyrir sig fagnaðarefni að verðbólga sé að lækka og vonandi verður framhald á því en við erum að fást við ástandið frá 2004 og til þessa dags." Gengi krónunnar var 102,8 þegar markaðir voru opnaðir í gærmorgun. Verðbólgutíðindin ollu því að krónan fór upp í 103,7 en sú breyting gekk svo til baka þegar erlend skuldabréfaútgáfa í krónum tók að aukast og krónan styrktist á ný. Gengi krónunnar endaði í 102,3.