Kosningabaráttan hafin

Margrét Sverrisdóttir lýsti því yfir í gær að hún sækist eftir öðru sæti á lista Frjálslyndra fyrir næstu borgarstjórnarkosningar. Á sama tíma lýsti hún yfir stuðningi við Ólaf F. Magnússon í fyrsta sætið og sagði það fagnaðarefni að hafa jafn reyndan mann í fyrsta sæti. Þau skipa nú fyrsta og annað sæti F-listans. Margrét sagðist vonast til að verða kjörin. Ef það gengi eftir yrði Frjálslyndi flokkurinn væntanlega í oddastöðu í borgarstjórn og hefði mikla burði til að sækja fram. "Við erum ekki sjálfkjörin," sagði Ólafur en miðstjórn flokksins tekur ákvörðun um uppröðun á lista. Hvorugt þeirra á von á því að prófkjör verði haldið. Borgarstjórnarflokkur Frjálslyndra hefur opnað nýja heimasíðu: www.f-listinn.is. Með því má segja að kosningabarátta flokksins fyrir borgarstjórnarkosningarnar sem verða í maí á næsta ári sé hafin. Frjálsyndi flokkurinn hyggst á næstu dögum dreifa veggspjöldum sem gerð voru vegna baráttunnar fyrir varðveislu götumyndar og elstu byggðarinnar við Laugaveg.