Kári hyggst kæra stjórnir LÍ og LR vegna greinar

Kári Stefánsson hyggst kæra stjórnir Læknafélags Íslands og Læknafélags Reykjavíkur til siðanefndar lækna fyrir að fjarlægja ekki grein Jóhanns Tómassonar læknis af vefútgáfu læknablaðsins. Í greininni deilir Jóhann hart á Kára.

Jóhann Tómasson segir meðal annars í grein sinni í læknablaðinu að dómgreindarleysi hafi verið að ráða Kára Stefánsson í afleysingar á taugadeild landsspítlans. Hluti ritstjórnar læknablaðsins hefur boðað uppsögn vegna birtingar greinarinnar. Ábyrgðarmaður blaðsins segir aftur á móti greinina vera ábyrgð þess sem hana skrifaði.

Kári Stefánsson segir að í sjálfu sér sé hann ekkert sérstaklega ósáttur við að Jóhann skrifi um hann grein. Hann hafi gert það oft á síðustu árum. Það sem trufli hann hins vegar sé að greinin birtist í fagriti læknafélagsins, Læknablaðinu, og í greininni sé vegið að starfsheiðri hans á þann hátt sem kveðið sé á um í siðareglum lækna að eigi ekki að gera. Kári segir að ef læknir hefur eitthvað út á annan lækni að setja eigi það að fara í ákveðinn farveg og að sá farvegur sé ekki Læknablaðið.

Kári segir ábyrgðamann Læknablaðsins hafa vísvitandi ákveðið að birta grein sem brjóti í bága við þær siðareglur sem honum beri að fara eftir. Hann ætli að fara fram á afsökunarbeiðni vegna þess að hann telji það óheppilegt að verið sé að vega að starfsheiðri hans á þennan hátt. Þá líti hann á þetta sem fordæmi sem beri að forðast.

Kári segist ekki vita til þess að venja hafi verið að birta greinar sem þessar í Læknablaðinu. Hann vill fá afsökunarbeiðni fá Læknafélagi Íslands og Læknafélagi Reykjavíkur fyrir birtingu greinarinnar og að greinin verði tekin út af netútgáfu blaðsins. Stjórnin neitar þessu og hyggst Kári kæra málið til siðanefndar lækna.

Aðspurður um þá ásökun Jóhanns um að hann hafi ekki tilskilin leyfi til lækninga segir Kári að Landlæknisembættið hafi þegar verið spurt um málið og sagt að hann hafi lækningaleyfi. Hann hafi leyfi sem sérfræðingur í taugalækningum og taugameinafræði og hann hafi unnið við það svo áratugum skipti. Hann telji því að Jóhann hafi farið svolítið út fyrir mörkin í grein sinni.