Óvissa um sameiginlegt framboð

Enginn niðurstaða er komin í viðræður Vinstri-grænna, Frjálslyndra og Samfylkingar á Ísafirði um sameiginlegt framboð í bæjarstjórnarkosningunum að ári. Funda á aftur í næstu viku. Samfylkinarmenn á Ísafirði vilja sinn hlut stærri en hinna flokkanna í slíku framboði samkvæmt heimildum fréttastofu.

Það kemur eflaust ekki á óvart en það voru forsvarsmenn Vinstri-grænna á Ísafirði sem áttu frumkvæðið að viðræðum flokkanna, en Vinstri-grænir eiga ekki mann í bæjarstjórn Ísafjarðarbæjar ólíkt Frjálslyndum, sem eiga einn bæajrfulltrúa og Samfylkingu, sem er með tvo.

Fyrsti fundur framboðanna þriggja fór fram í fyrrakvöld og að sögn talsmanna þeirra fékkst enginn niðurstaða á þeim fundi. Ekki var heldur um að ræða að flokkarnir þrír settu fram kröfur sínar um hlut hvers og eins í sameiginlegu framboði og var niðurstaðan því að flokkarnir funduðu hver í sínu lagi í vikunni og hittust í næstu viku til frekari viðræðna.

Sigurður Pétursson, formaður Samfylkingarfélags Ísafjarðar, segir lítið hægt að segja til um árangur viðræðnanna ennþá enda hafi fyrsti fundur einungis verið til þess að fara lauslega yfir málið. Í sama strengu tekur einnig fulltrúi Frjálslyndra, Magnús Reynir Guðmundsson, sem vill ekkert segja til um gang mála og það hvort Frjálslyndir geri kröfur um aukið á vægi á Vinstri-græna í krafti stærðarmunur framboðanna í síðustu kosningum.

Lilja Rafney Magnúsdóttir formaður vinstri grænna á Ísafirði vildi þó lítið gefa upp um kröfur þeirra í viðræðunum að öðru leyti en þær væru á jafnréttisfrundvelli. Hún kveðst þó ekki útiloka neitt.

Samkvæmt heimildum fréttastofu er þó ekki líklegt að í það minnsta Samfylkingarmenn muni sættast á jafna skiptingu sæta milli framboðanna þriggja enda líti þeir svo á að munur á fylgi flokkanna sé það mikill í bænum að ekki sé annað hægt en að þess sjáist merki á sameiginlegu framboði flokkanna, komi til þess að þeir bjóði fram saman.