Úlpan hafin til flugs

Hafnfirska rokksveitin Úlpa heldur útgáfutónleika á fimmtudag vegna annarrar plötu sinnar, Attempted Flight by Winged Men, sem kom nýverið út á vegum 12 Tóna. Fyrsta plata Úlpu, Mea Culpa, kom út fyrir fjórum árum og því hafa margir beðið nýju plötunnar með mikilli eftirvæntingu.

Vinnsla við plötuna hófst undir lok 2002 en henni lauk ekki fyrr en í haust. Að sögn Halla trommara urðu ýmsir atburðir til þess að platan tafðist. "Við vorum að gera þetta sjálfir og það var erfitt að fá fólk til að aðstoða okkur við upptökur," segir Halli. "Við áætluðum líka minni tíma heldur en raunin varð. Síðan lentum við í því að missa harða diskinn í algjört tjón. Við urðum að senda hann til London í "rehab" og um tíma héldum við að við værum búnir að tapa plötunni. Síðan komu nokkrir tímapunktar þar sem við fórum að gera eitthvað annað."

Á þessum tímapunktum fór Úlpa meðal annars í stutta tónleikaferð um austurströnd Bandaríkjanna með hljómsveitinni Lake Trout, sem spilaði á Innipúkanum í sumar. Einnig fór sveitin tvisvar sinnum til Færeyja, þrisvar til Danmerkur og til Austurríkis, Þýskalands og London, á milli þess sem hún vann plötuna. Halli segir að eins og gefur að skilja hafi verið meira legið yfir nýju plötunni en þeirri. Hún nær einnig yfir lengra tímabil. Fyrsta lagið hafi verið samið fyrir hátt í fimm árum en það nýjasta nú í sumar. Nafnið á plötunni er einmitt vísun í það hversu erfiðlega gekk að vinna plötuna.

"Þetta er bjagað nafn af frægu málverki sem við rákumst á. Okkur fannst þetta passa svo vel við það sem við vorum að gera og hvernig ferlið á plötunni var því við vorum alltaf að hefja hana til flugs," segir hann.

Útgáfutónleikarnir á fimmtudag verða haldnir í Þjóðleikhús­kjallaranum og hefjast klukkan 23.00. Miðaverð er 500 krónur en þeir sem mæta í Millet-úlpum fá frítt inn.

Auk þess fá þeir fjórir fyrstu sem gefa hljómsveitarmeðlimum Millet-úlpur nýju plötuna áritaða og smáskífu að launum.

"Okkur langar í svona úlpu sjálfir. Þetta var orðinn svo langur og þreyttur brandari að við ákváðum að snúa honum," segir Halli og hlær.