Árás umhverfissinna olli uppnámi

Uppnám varð á ráðstefnu um álmál í dag þegar róttækir umhverfissinnar skvettu grænleitum vökva yfir fundargesti. Töluvert uppnám varð þegar þrennt réðst inn í ráðstefnusalinn og skvetti þar skærgrænu þykkni af einhverju tagi á fundargesti, yfir háborðið og tæknibúnað þar. Í kjölfarið lagðist einn náttúruvinurinn á gólfið og annar reyndi að komast burtu. För hans var stöðvuð og skömmu síðar kom lögregla til að handtaka fólkið. Um var að ræða herskáa náttúruverndarsinna, fólk sem nýlega skipulagði einskonar námskeið í borgaralegri óhlýðni. Ólafur Páll Sigurðsson var þar fremstur í flokki ásamt Örnu Ösp Magnúsardóttur og breska atvinnumótmælandanum Paul Gill. Ráðstefnugestum var augljóslega nokkuð brugðið þegar þeir komu út af fundinum eftir að hafa fengið yfir sig græna gumsið. Þeir vissu reyndar ekki hvað var þarna á ferð. Efnið reyndist vatnsblönduð súrmjólk með grænum matarlit en sú vitneskja virtist ekki róa fundarmenn sem fréttastofan ræddi við. Þeim var mikið niðri fyrir en vildu ekki koma í viðtal. Þeir voru þó sannfærðir um að þetta myndi skaða ásýnd Íslands og undruðust að einhver skildi vilja og geta ráðist inn á friðsamlega ráðstefnu. Hótelstjórnin tók málið augsýnilega mjög alvarlega og hótelstjórinn bannaði allar myndatökur. Það er enda ljóst að mennirnir þrír komust fram hjá starfsfólki hótelsins og að þeir hefðu getað komið með hvað sem er inn í fundarsal - nokkuð sem gæti skaðað ásýnd ráðstefnuhótels. Síðdegis boðaði Landsvirkjun fréttamenn á fund fyrir hönd skipuleggjenda ráðstefnunnar. Þá voru lögreglumenn á verði og öryggisverðir í dyrum sem áttu að leita á fréttamönnum. Þegar fréttamenn sýndu á sér fararsnið breyttist afstaðan, enda ráðstefnustjórum mikið í mun að tjá ánægju sína með allt hér á landi, þrátt fyrir súrmjólkina. Jóhannes Geir Sigurgeirsson, stjórnarformaður Landsvirkjunar, sem fékk hluta af gusunni yfir sig, sagði við fjölmiðla að hann væri enn að reyna að átta sig á því hvað gerðist. „Við höfum enga trú á að hér hafi verið íslensk samtök á ferð. Þetta eru ekki þær starfsaðferðir sem við þekkjum hér,“ sagði Jóhannes.