Strangar reglur um innflytjendur

Enn hafa Tony Blair og Verkamannaflokkurinn forskot á keppinauta sína samkvæmt könnunum en harkan eykst núna á lokasprettinum.Breski Íhaldsflokkurinn hefur sett strangari reglur um innflytjendur á oddinn í sinni kosningabaráttu. Þetta er sérstakt hitamál í Bradford þar sem Brynhildur Ólafsdóttir, fréttamaður Stöðvar 2 og Bylgjunnar, var á ferð í dag. Þrátt fyrir að fjöldi þeirra útlendinga sem árlega flytja til Bretlands sé ekki ýkja mikill samanborið við önnur stór Evrópulönd, eins og Þýskaland eða Frakkland, þá sækja útlendingar í auknum mæli til Bretlands og Bretar hafa af þessu nokkrar áhyggjur. Íhaldsflokkurinn hefur heitið því að komist hann til valda verði settir fastir kvótar á hversu margir útlendingar fá atvinnuleyfi í Bretlandi og hversu margir flóttamenn fá pólitískt hæli. Þá vill flokkurinn að Bretland segi sig frá sáttmála Sameinuðu þjóðanna um flóttamenn. Verkamannaflokkurinn hefur reyndar einnig heitið því að herða reglur og það eru aðeins Frjálslyndir demókratar sem hafa ekki tekið þátt í þessari umræðu nú. Paul Kelly, prófessor í stjórnmálafræði við London School of Economics, segir að í rauninni séu innflytjendur ekki stórt  vandamál í landinu hvað varðar fjölda fólks sem komi, hvernig tekist sé á við málið og efnahagslegar þarfir Breta. Fólk skynji þetta hins vegar sem mikið vandamál og íhaldsmenn spili á það og vonist til að að græða á því. Kelly segir að önnur ástæða sé að þetta sé leið þeirra til að sameina stuðningsmenn sína. „Þeir geta ekki ráðist á Blair á grundvelli stóru málanna, eins og versnandi efnahags því hann er það ekki, og þeir studdu líka stríðið. Þeir þurfa því að nota eitthvað annað og innflytjendamál eru lýðskrum,“ segir Kelly. Mikill fjöldi innflytjenda, sérstaklega frá Pakistan og Indlandi, hefur sest að í breska bænum Bradford. Í upphafi vantaði vinnuafl í spunaverksmiðjur sem hér voru á hverju strái en þegar sá iðnaður fór á hausinn stóð fólk uppi atvinnulaust. Blóðugar kynþáttaóeirðir hafa ítrekað blossað upp hér í Bradford í hjarta Englands. Málefni innflytjenda skipta íbúa hér miklu máli og af svörum fólksins á götunni að dæma eru skoðanirnar skiptar um innflytjendastefnu Íhaldsflokksins. Íraksstríðið hefur líka sett mark sitt á þessa kosningabaráttu og Tony Blair sætir stöðugri gagnrýni vegna þátttöku Breta í stríðinu. En hversu mikil áhrif hefur Írak á kosningarnar? Brynhildur leitar svara við þessu á morgun en þá á hún stefnumót við herskáa, breska múslima sem segja að Blair sé ótíndur hryðjuverkamaður.