Mál Orkunnar enn í skoðun

Samkeppniseftirlitið hefur til athugunar hvort ástæða sé til að hefja sjálfstæða rannsókn á hlut Bensínorkunnar í ólöglegu samráði olíufélaganna. Félaginu var tilkynnt um þetta bréfleiðis eftir úrskurð áfrýjunar­nefndar Samkeppnis­mála í lok janúar, en í honum var talið að ekki hefði verið gætt andmælaréttar Bensínorkunnar.

Því var fallist á kröfu um niðurfellingu fjörutíu mill­jón króna sektarúrskurðar sam­keppnis­ráðs frá því í október 2004.

Guðmundur Sigurðsson, for­stöðu­­maður hjá Sam­keppnis­­eftirlitinu, segir hafa verið litið svo á að mál Orkunnar ættu samleið með málum Skeljungs.

"Og frá lögmönnum Skeljungs, sem við skrifuðum sem meirihluta­eiganda í Orkunni, fengum við ekki ábendingar um annað en þeir myndu taka til varna fyrir fyrirtækið. Svo var öðru haldið fram við áfrýjunarnefnd, það er að Samkeppnis­stofnun hefði aldrei snúið sér til Bensínorkunnar", segir hann og bætir við að stofnunin hafi snúið sér til Bensín­orkunnar á ný skömmu eftir niðurstöðu úrskurðar­nefndarinnar.

Guðmundur segir Orkuna í svari til stofnunarinnar hafa haft uppi sjónarmið um fyrningu mála. En frekari afstaða í málinu hefur ekki verið tekin, segir hann og treysti sér ekki til að segja til um hvenær ákvörðunnar kynni að vera að vænta.