Nýtt sveitarfélag í uppsiglingu

Líklegt er að Borgarbyggð, Borgarfjarðarsveit, Hvítársíðuhreppur og Kolbeinsstaðahreppur verði sameinuð í eitt sveitarfélag. Í kosningum á laugardag samþykkti meirihluti íbúa sameiningu sveitarfélaganna fjögurra og Skorradalshrepps að auki en Skorrdælingar felldu. Þar sem sameiningin var samþykkt af meirihluta allra íbúa þarf að kjósa aftur í Skorradal. Sveinbjörn Eyjólfsson, oddviti Borgarfjarðarsveitar og formaður sameiningarnefndar, kveðst sæll og glaður með úrslit kosninganna en viðurkennir að heldur hefði hann kosið að hafa Skorradal með. "Við bíðum eftir seinni kosningunni þar og ég skora á fólk að fara vel yfir málið og sjá hvort það eigi ekki betur heima með okkur en að standa eitt og sér," segir Sveinbjörn en vill engu spá um niðurstöðurnar. Hann telur þó litlu skipta fyrir hugsanlegt nýtt sveitarfélag hvort Skorradalur verður með eður ei. "Við náum fram langmestu af þeirri hagræðingu og þeim breytingum sem við ætluðum okkur með þessum fjórum sem samþykktu. En Skorradalurinn verður þá enn meira eyland á eftir. Þar eru 65 íbúar og þó að nálægðin og fámennið kunni kannski að vera notalegt á stundum getur það einnig verið mjög grimmt þegar svo ber undir." Hver sem úrslitin verða er nýtt og öflugt sveitarfélag norðan Skarðsheiðar í farvatninu, í það minnsta finnst Sveinbirni mjög líklegt að sveitarfélögin sem samþykktu sameinist. Í því byggju nálega 3.500 íbúar og yrði það fjórtánda fjölmennasta sveitarfélag landsins og það sjöunda fjölmennasta utan höfuðborgarsvæðisins. Sveinbjörn segir helstu kosti sameinaðs sveitarfélags liggja í öflugu stoðkerfi til þjónustu við íbúana, sérstaklega í minni sveitarfélögunum. "Í annan stað held ég að styrkur þessarar sameiningar liggi í samkeppni við önnur sveitarfélög um fólk og fyrirtæki. Ég tel að það sé engin tilviljun hve mikið er að gerast í Árborg, Fjarðabyggð, Skagafirði og á Suðurnesjum. Þar sjáum við beina afleiðingu af sameiningu sveitarfélaga þar sem boðið er upp á þjónustu sem fólk og fyrirtæki kunna að meta. Þess vegna vill fólk vera þar."