4 ár frá árásunum á Bandaríkin

Í dag eru fjögur ár liðin frá hryðjuverkaárásunum á Bandaríkin. Minningarathafnir um fórnarlömbin verða haldnar víða í dag en þær verða lágstemmdar, enda eru Bandaríkjamenn rétt að átta sig á þeim hörmungum sem fellibylurinn Katrín olli í suðurhluta landsins. Klukkan fjórtán mínútur fyrir níu að morgni ellefta september árið 2001 var fullri farþegaflugvél flogið á annan tvíburaturnanna svökölluðu, World Trade Center, í New York. Nokkrum mínútum síðar var annarri vél flogið á hinn turninn og á endanum hrundu þeir báðir. Þriðju vélinni var flogið á varnarmálaráðuneytið Pentagon í Washington en sú fjórða brotlenti eftir að farþegar reyndu að yfirbuga flugræningjana. Henni var líklega ætlað að lenda á Hvíta húsinu. 2.749 manns fórust í New York þennan dag. Minningarathöfn verður haldin í dag við Ground Zero, lóðirnar þar sem turnarnir stóðu. Ættingjar þeirra sem létust munu þar lesa upp nafn hvers einasta fórnarlambs. Fjórum árum eftir þennan afdrifaríka dag er hægt að líta yfir sviðið og sjá afleiðingar árásanna. Bandaríkjaforseti lýsti yfir stríði - stríði gegn hryðjuverkum. Og þeir sem ekki væru með honum í liði væru á móti honum. Stríðinu lyki ekki fyrr en hver einasti hryðjuverkamaður hefði verið sigraður. Ráðist var inn í Afganistan og talíbanastjórninni komið frá en Afganistan var talið gróðrarstía og uppeldisstöð hryðjuverkasamtaka í heiminum. Bandaríkjamenn nutu mikillar samúðar og stuðnings fyrstu misserin eftir árásirnar en sá stuðningur þvarr þegar ákveðið var að ráðast inn í Írak. Forsprakki Al-Qaida samtakanna, sem stóðu á bak við árásirnar, Osama bin Laden, hefur aldrei náðst og það er óhætt að segja að stríðinu gegn hryðjuverkum sé hvergi nærri lokið ef því lýkur nokkru sinni - hryðjuverk á Vesturlöndum hafa aukist og nægir að nefna Madrid og Lundúnir í því sambandi. Minningarathafnir í Bandaríkjunum í dag eru auðvitað haldnar í skugga fellibylsins Katrínar og fórnarlamba hennar og eru því lágstemmdar að mörgu leyti. Byrjað er að byggja upp á svæðinu þar sem turnarnir stóðu en þar verður samgöngumiðstöð og svokallaður frelsisturn sem á að verða tilbúinn eftir sex ár, árið 2011.