Ný heimildamynd um Guðberg

Rithöfundur með myndavél – Óformleg ævisaga er heiti nýrrar heimildamyndar eftir Helgu Brekkan um rithöfundinn Guðberg Bergsson sem verður frumsýnd í Regnboganum annað kvöld, þriðjudaginn 23. nóvember kl. 18:00. Um er að ræða nokkurs konar ”óformlega ævisögu” rithöfundarins Guðbergs Bergssonar. Myndin byggir á super-8 kvikmyndum sem Guðbergur tók á ferðum sínum og þegar hann dvaldi lengi á Spáni og í Portúgal. Hann kvikmyndaði m.a. í Negulblómabyltingunni í Lissabon árið 1974 og við útför Francos í Madríd árið 1975. Þessar myndir Guðbergs hafa ekki verið sýndar opinberlega áður. Í myndinni eru einnig nýjar kvikmyndatökur Guðbergs, en hann vinnur nú sjálfur að heimildamynd um listmálarann Gunnlaug Scheving. Einnig hefur hann oft kvikmyndað móðursystur sínar Valgerði og Sigrúnu í Grindavík. Heimabær Guðbergs Grindavík er miðpunktur myndarinnar en aðrir tökustaðir eru: Reykjavík, Madrid, Stokkhólmur og Lissabon. Á meðan á gerð myndarinnar stóð hlaut Guðbergur Norrænu bókmenntaverðlaun hinnar sænsku akademíu í Stokkhólmi. Í vor var hann kjörinn heiðursborgari Grindavíkur. Helga Brekkan er kvikmyndagerðarmaður sem býr og starfar í Svíþjóð. Helga Brekkan og Guðbergur Bergsson munu svara spurningum úr sal að lokinni frumsýningu klukkan 18:00 í Regnboganum. Myndin er sýnd á dagskrá Alþjóðlegrar kvikmyndahátíðar í Reykjavík sem stendur nú dagana 17. – 25. nóvember. Leikstjórn og handrit myndarinnar var í höndum Helgu Brekkan. Klippingu annaðist Steinþór Birgisson. Myndin er gerð með stuðningi frá Kvikmyndastofnun Íslands - Kristínu Pálsdóttur og Svenska Filminstitutet - Hjalmar Palmgren. Nánari upplýsingar um Alþjóðlega kvikmyndahátíð í Reykjavík hátíðina er að finna á filmfest.is