Stjórnmálaflokkar spilltastir

Íslenskir stjórnmálaflokkar eru spilltustu stofnanir íslenska samfélagsins. Þetta eru niðurstöður nýrrar alþjóðlegrar könnunar. Stjórnmálaflokkar eru taldir spilltasta aflið í sex af hverjum tíu löndum sem þátt tóku í könnuninni. Hér á landi er viðskiptalífið talið næstspilltasti geiri samfélagsins og fjölmiðlar eru í þriðja sæti.  Íslenskur almenningur telur stjórnmálaflokka vera spilltasta afl íslenska samfélagsins. Þar á eftir kemur viðskiptalífið og fjölmiðlar eru þriðji spilltasti geirinn. Þetta eru niðurstöður alþjóðlegrar könnunar sem Gallup framkvæmdi í sumar fyrir alþjóðastofnunina Transparency International sem hefur það að höfuðmarkmiði að berjast gegn spillingu. Almenningur í 62 löndum gaf stofnunum samfélagsins einkunn á bilinu 1-5 og í 36 löndum, eða tæplega 60 prósentum ríkja, telur almenningur að spilltasta afl samfélagsins séu stjórnmálaflokkar. Í fréttatilkynningu frá stofnuninni segir að stjórnmálaflokkar séu þjálfunarbúðir fyrir þjóðarleiðtoga framtíðarinnar og löggjafa framtíðarinnar. Því sé afar mikilvægt að það sé bundið í lög að fjármál stjórnmálaflokka séu gerð gagnsæ og opinber og að stjórnmálaflokkar upplýsi um öll framlög sem þeim berist. Þessu hefur verið afar ábótavant í starfi íslenskra stjórnmálaflokka um áratugaskeið. Þrjú prósent Íslendinga kannast við að hafa greitt mútur á síðustu tólf mánuðum. Það er lítið miðað við að meðaltalið er tíu prósent þjóðar, en mikið í samanburði við nágrannaríki okkar, en þar trjóna Íslendingar efstir ásamt Finnum og Norðmönnum. Rúm 40 prósent Íslendinga telur að spilling muni aukast á næstu þremur árum en einungis sjö prósent telja að það dragi úr spillingu. Flestir, eða 45 prósent, telja spillingu haldast óbreytta, en sex prósent gáfu ekkert svar við þessu.