Blikkljós þyrluáhafna reynast vel

Rauðu blikkljósin, sem starfsmenn þyrluáhafna Landhelgisgæslunnar fengu í bíla sína í haust til að auðvelda þeim að komast áfram í umferðinni þegar þeir eru á leið í bráðaútkall, hafa gefið mjög góða raun að sögn Friðriks Höskuldssonar, stýrimanns í þyrluáhöfn gæslunnar. Sem dæmi nefnir Friðrik að vikuna 13.-20. desember var þyrluáhöfn í þrígang kölluð út með bráðaútkalli en það þýðir að um líf eða dauða sé að tefla. Þessi útköll voru á þeim tíma dags sem umferð í Reykjavík er mikil, eitt þeirra t.d. um kl. 16:30. Friðrik notaði blikkljósin, sem eru á sólskyggni farþegamegin í bílum starfsmanna, á leið sinni út á flugvöll og segir að ökumenn hafi tekið fullt tillit til sín, vikið fyrir sér og jafnvel stöðvað úti í kanti svo hann kæmist leiðar sinnar. Þá hafi hann einnig notið aðstoðar lögreglunnar til að komast áfram í umferðinni.  Friðrik vill koma á framfæri þakklæti til bílstjóra á höfuðborgarsvæðinu vegna tillitsemi þeirra og segir að félagar hans í þyrluáhöfnum Landhelgisgæslunnar hafi svipaða sögu að segja.