Rokkað á Bessastöðum

Í síðustu viku kom út frekar athyglisverð plata. Í rauninni er um tímamótaverk í tónlistarsögunni að ræða því þetta er fyrsta tónleikaplatan sem hljóðrituð var á forsetasetrinu að Bessastöðum. Það er hljómsveitin Trabant sem braut þennan ófyrirsjáanlega hljóðmúr. Trabant leika skemmtilega blöndu hipphopp, fönks, rokks og raftónlistar og eru án efa rísandi stjörnur í tónlistarlífi Klakans. Þeir eru vinsælir í veislurnar, enda eiga þeir það til að rífa utan af sér fötin og láta öllum illum látum á tónleikum. Herra Ólafur Ragnar kann greinilega að meta það, eða hvað? "Ólafur Egilsson listamaður er hress og er leitandi í tónlist og þegar það kom upp á dyrnar að halda ætti boð honum til heiðurs á Bessastöðum hafði hann samband við okkur," útskýrir trommuleikarinn Þorvaldur Gröndal, eða Doddi eins og vinir hans kalla hann. "Hann bað um að við yrðum húsbandið í veislunni. Svo blandaði Dorrit sér í málið og hún er svo rosalega hress að þau börðust fyrir því að við spiluðum, og fengu það í gegn." Trabant spilaði tvö sett á efri hæð Bessastaða og tóku ferðahljóðverið sitt með. Fyrst spilaði Trabant á undan matnum, en þá voru flestir niðri að hlýða á djasstónlist. Síðar um kvöldið, þegar meira fjör var komið í leikinn, var sveitin beðin um að leika aftur. Bæði Ólafur Ragnar og forsetafrúin stigu þá dans við tóna Trabant. Á plötunni eru að finna tvö lög, auk ávarps forsetans úr veislunni. "Þar þakkaði hann mönnum fyrir og nefndi það að þetta væri í fyrsta skiptið í sögu forsetaembættisins sem græjuhljómsveit spilaði að Bessastöðum. Í öðru laginu spila svo djassarnir Tómas R, Óskar og Ómar Guðjónssyni með okkur. Þeir komu upp og við spunnum allir saman lag á staðnum." Skiljanlega voru liðsmenn Trabant öllu virðulegri á Bessastöðum en annars staðar. Ragnar Kjartansson söngvari á það til að líma dúsk á geirvörtur sínar, sem hann hristir svo eins og fatafella. Viddi bassaleikari á það svo til að klæða sig úr öllu nema g-strengs hlébarða nærbuxum. "Raggi tók svona hátíðarútgáfu af þessu stripp-sjói sínu," segir Doddi. "Þó maður sé að spila á svona uppákomum þá verður þetta að vera með. Við fengum þó ekki að vera með sprengjur. Skrýtið." Trabant hafa greinilega slegið í gegn í veislunni því greifynja frá Sviss sem þar var stödd pantaði sveitina í afmælisveislu sína sem haldin var fyrir tveimur vikum síðan. "Dorrit er góð vinkona þessarar barónessu, Francescu von Habsburg. Hún er líka listaverkasafnari. Hún bauð okkur út að spila og þar var allt fullt af mat, listaverkasöfnurum og öðrum milljarðamæringum," segir Doddi að lokum, vanur því að skemmta ríka fólkinu. Aðeins verða gerð 500 númeruð eintök af Bessastaðaplötunni og er hún fáanleg í 12 Tónum. Herra Ólafur Ragnar Grímsson fær auðvitað afhent eintak númer 1. Trabant eru að hljóðrita aðra breiðskífu sína þessa dagana. Ný smáskífa, Nancy Boy, fær útgáfu í haust. Á henni verða m.a. að finna endurhljóðblandanir frá Moloko, Gusgus og Capt. Comatose. Breiðskífan fylgir svo í kjölfarið. biggi@frettabladid.is