Skoðar orustur í sumarblíðunni

Ég hef rannsakað örlagaríkar orustur frá því árið 1980 en ég lærði sagnfræði áður en ég sneri mér að guðfræðinni," segir séra Þórhallur Heimisson en hann segir sagnfræðina vera sitt stóra áhugamál. "Útgáfa bókarinnar "10 örlagaríkustu orustur Vesturlanda" verður lokahnykkurinn á löngu ferli en ég er að leggja lokahönd á hana í sumarblíðunni." Þórhallur tekur fyrir í bókinni tíu örlagaorustur sem hefðu getað breytt algjörlega veraldarsögunni hefðu þær farið öðruvísi. "Það er jafnvel einn maður sem hefði getað breytt öllu ef hann hefði tekið aðra ákvörðun en hann gerði. Hver kafli er um eina slíka orustu en ég fer í forsögu og aðdraganda hverrar þeirra, hverjir tókust á og af hverju. Ég fjalla síðan um orustuna sjálfa og hvaða afleiðingar hún hafði á söguna og þá sem í henni tóku þátt," segir Þórhallur og bætir því við að margar séu þær mjög dramatískar. Aðspurður af hverju orustur hafi vakið forvitni hans segir Þórhallur örlagastundirnar vera ástæðuna. "Þetta eru oft fáeinar mínútur sem skipta máli. Þetta eru þó stundir sem margar hverjar eru gleymdar og menn líta frekar á þetta sem sagnfræðilegar staðreyndir. Það er hins vegar mikil dramatík fólgin í þeim öllum. Þetta eru persónulegar frásagnir af einstaklingum sem tóku þátt, karlar og konur sem lentu í þessu af algjörri tilviljun en urðu miklir örlagavaldar." Guðfræðin fléttast inn í þessa vinnu og er það ástæðan fyrir því að Þórhallur ákvað endanlega að setja verkið saman. "Átök milli múslima og kristinna, Vesturlanda og Austurlanda eru áberandi og ég hef velt því fyrir mér hver ástæðan fyrir þessum mikla núningi í gegnum aldirnar sé og þessum ægilegu óhæfuverkum á báða bóga." Að mati Þórhalls átti örlagaríkasta orustan sér stað við Poitier árið 732 en þar tókust múslimar og Evrópubúar á í Frakklandi. "Ef Frakkar hefðu ekki unnið væru Vesturlönd ekki til þar sem þetta var eini herinn sem stóð á milli og Arabar hefðu lagt undir sig Evrópu. Rétt eftir þetta fóru okkar menn að streyma yfir til Evrópu og þeir hefðu líklegast ekki mætt kristnum mönnum heldur múslimum og þar af leiðandi værum við líklegast múslimar. Það var einn maður sem tók ákvörðun og mótaði veröldina eins og hún er í dag," segir Þórhallur. Bók Þórhalls verður gefin út af Bókaútgáfunni Hólum og mun koma út með haustinu.