Jólahald í uppnámi vegna veðurs

Vonskuveður á Norður- og Austurlandi hefur sett jólahald í uppnám á mörgum heimilum. Fólk komst hvorki lönd né strönd, og björgunarsveitarmenn hafa verið við störf í alla nótt og í dag. Frá Svalbarðseyri, austur að Lóni eru allir vegir ófærir. Ófært er á Akureyri og þótt veður hafi skánað er mælt með því að bæjarbúar haldi sig heima við, nema brýna nauðsyn beri til. Lögregla og björgunarsveitarmenn á sérbúnum bílum aðstoðuðu starfsfólk sjúkrastofnana við að komast til vinnu í morgun og hafa þurft að draga þó nokkra fólksbíla úr sköflum í dag. Síðdegis var björgunarsveitin einnig beðin um að fara með viðgerðarmenn upp á Vaðlaheiði til að reyna að koma aftur á útsendingum ríkisútvarpsins, en útsendingar beggja rása ríkisútvarpsins lágu niðri á svæðinu eftir hádegi í dag. Fyrir norðan segja menn þó að einstaklega vel hafi gengið miðað við aðstæður. Enginn hefur slasast og ekki er vitað til þess að tjón hafi orðið á eigum fólks. Á Húsavík er einnig allt ófært og þar voru lögreglumenn og björgunarsveitir að störfum í nótt og í dag við að koma fólki til síns heima. Elstu menn muna ekki eftir sambærilegum veðurham á jólum, en í bænum eru víða mannhæðarháir skaflar og dæmi eru um að fólk hafi þurft að moka sig í gegnum snjó til að komast út úr húsi. Undir morgun var veðrið þó einna verst á austanverðu landinu, en í vindhviðum fór vindhraðinn allt upp í þrjátíu metra á sekúndu. Á Vopnafirði var til að mynda ekkert skyggni og mjög þungfært. Aflýsa þurfti messum og hefur fólk að mestu haldið sig innan dyra, ólíkt þessum börnum á Egilsstöðum sem nýttu sér snjóinn til hins ítrasta.