Stjórnsýslukæru vísað frá

Stjórnsýslukæru sem barst landbúnaðarráðuneytinu vegna niðurskurðar búfjár í Biskupstungum hefur verið vísað frá þar sem kærandi eigi ekki aðild að málinu. Guðbrandur Jónsson, kærandi og verkefnastjóri í Saurbæ-biogas, segir ákvörðun landbúnaðarráðuneytisins ósmekklegan útúrsnúning. "Ég vísaði til laga um dýravernd í þessu máli og að hér væri um að ræða árás á genasamsetningu sauðkinda á Íslandi. Þetta er frekleg misbeiting valds," segir Guðbrandur. Ekki náðist í lögfræðinga landbúnaðarráðuneytisins.