Miltisbrandur á Reykjanesi

Í síðustu viku voru brennd á Reykjanesi hræ fjögurra hrossa sem höfðu greinst með miltisbrand. Upptökin eru ókunn og litlar líkur taldar á að þau finnist. Dagbjartur Einarsson, útgerðarmaður í Grindavík, segist ekki óttast þennan vágest. "Ég verð nú að viðurkenna að ég er ekki búinn að velta mér mikið upp úr þessu. Ég hef heyrt talað um þetta en er svo sem ekkert hræddur. Það er að minnsta kosti ekki á prjónunum að grafa upp garðinn." Dagbjartur á jarðir úti á landi, Svefneyjar á Breiðafirði nánar tiltekið, og óttast ekki hót að miltisbrandur stingi sér þar niður. "Það hefur ekki einu sinni hvarflað að mér. Ég á þrjár kindur þarna en þær eru í gistingu í Flatey á veturna." Dagbjartur á líka nokkrar kindur í Grindavík og er forðagæslumaður og vinnur við að telja dýrin. Hann hefur aldrei orðið vitni að þess konar ógæfu að skepnur taki slíka sótt að það verði að fella þær. "Ég hef aldrei upplifað það enda er þetta mjög sjaldgæft. Það eru rúm 40 ár síðan eitthvað slíkt gerðist. Maður hleypur því ekki upp til handa og fóta þó maður heyri af einu tilfelli, þótt alvarlegt sé. Ég er sallarólegur."