Kristján er heitastur í Danmörku

Fókus fylgir DV í dag og þar er allt fullt af ótrúlegum skemmtilegheitum. Valin eru bestu og verstu plötuumslög íslensku jólavertíðarinnar, birtar myndir úr heimildarmyndinni um Mínus eftir Frosta Runólfsson, talað við íslenska fyrirsætu sem var valin Miss Colorado en vinnur nú fyrir sér í bikiní í glerkassa í álíka frosti og er hér hjá okkur ---- OG MARGT FLEIRA. Í Fókus er líka viðtal við Kristján Eggertsson, sem er aðalsprautan í hljómsveitinni Delicia Mini sem er það heitasta í Danaveldi nú um stundir. Lög þeirra eru spiluð margsinnis á dag, plötudómarnir hafa verið frábærir og þeir rjúka upp vinsældarlistanna. Fókus hringdi í Kristján og fékk að vita hvað væri eiginlega í gangi. "Það er alla vega búið að ganga vel síðustu tvær vikurnar," segir Kristján Eggertsson gítarleikari, söngvari og hljómborðsleikari hljómsveitarinnar Delicia Mini sem er að gera allt vitlaust í Danmörku þessa dagana. Fyrsta plata þeirra í fullri lengd, Skuggi, kom út fyrir tveimur vikum og hefur þegar fengið gríðar góðar viðtökur. Tónlist þeirra er sögð vera einhvers staðar á milli sirkustónlistar og Belle and Sebastian. Fullt hús á öllum stöðum "Politiken útnefndi plötuna eina af þeim fimm bestu í augnablikinu og Danmarks Radio valdi okkur nafn mánaðarins í nóvember og gaf plötunni fimm stjörnur. Gaffa, sem er stærsta tónlistartímaritið í Danmörku, gaf henni líka fimm stjörnur og þetta hefur verið svipað annars staðar," segir Kristján sem er að vonum ángæður með viðtökurnar. Hann er aðal laga- og textahöfundur bandsins en lag þeirra Pull the Trees Down fór beint í annað sætið á "Den Elektriske Barometer" sem er helsti óháði vinsældarlistinn í Danmörku. "Svo var annað lag, Back to Pieces, valið smáskífa vikunnar á útvarpsstöðinni P3," sem er eins konar Rás2 þeirra Dana og sú stöð sem hefur mesta hlustun. Já, það er nóg að gerast hjá Kristjáni. Viðtalið við hann má lesa í fullri lengd í Fókus, sem fylgir DV í dag.