Verðugur ráðherra: Condo Rice

Nýr utanríkisráðherra Bandaríkjanna - Jón Valur Jensson guðfræðingur Þungu fargi er af þeim létt sem óttuðust um stund að utanríkisstefna Bandaríkjanna yrði sveigð til eftirgjafar og undanhalds með nýjan og veikari mann á forsetastóli, veraldarhyggjufrömuðinn Kerry. Enginn gat treyst honum í utanríkismálum, eins og hann hafði lýst stefnu sinni með því að slá úr og í, auk þess að opinbera tvöfalt siðferði að því er tók til þess að fylgja eftir kristnum innblæstri um ólík úrlausnarefni í stjórnmálum. Hin fluggreinda dr. Condolezza Rice hefur geypilegan talent í starf utanríkisráðherra, fyrsta flokks menntun, góðan bakgrunn og alhelguð þessum málaflokki og þjóðaröryggi um langt árabil. Glæsileg frammistaða hennar fyrir aðgangsharðri þingnefnd (í beinni útsendingu) í sambandi við viðbrögð stjórnvalda vegna árásanna 11. sept. 2001 vakti aðdáun þess sem þetta ritar. Einlæg kristin trú hennar gerir ekki annað en mæla með henni í augum réttsýnna. Hún er no-nonsense manneskja sem lét ekki mata sig á innantómum blekkingum, auvirðilegum undanfærslum og hráskinnaleik þegar leiðtogar talíbana í Khabúl þóttust enga ábyrgð bera á Osama bin-Laden, en harðneituðu samt að framselja hann -- fyrr skyldu þeir falla með honum! Aðeins ein ríkisstjórn (Pakistans) hafði þá viðurkennt stjórn þeirra sem löglega, meðan umheimurinn horfði upp á harðstjórnina með undrun og skelfingu. Það er tímaskekkja (eins og gert er á Vísir.is 18/11) að ásaka Condolezzu fyrir einarðan hlut hennar að því, að talíbanar voru sviptir völdum og æfingamiðstöðvar al-Qaída upprættar í Afganistan. Flestöll lönd létu sér það þá vel líka, enda var mannfall sáralítið miðað við þá rúmu einu og hálfu milljón sem féll í landvinningastríði Sovétmanna þar 1979-89.Það er vonandi að dr. Rice hafi frumkvæði að því að SÞ taki engum vettlingatökum á Darfúr-fjöldamorðunum (sem eru ekkert minna en glæpsamleg þjóðernishreinsun) og sendi þangað friðargæzlulið; en ef Öryggisráðið veldur ekki verkefninu eða neitunarvaldi verður enn beitt í því skyni að sprengja upp samstöðu á þeim vettvangi, þá verða Bandaríkin að fara inn í Darfúr í bandalagi með þeim staðföstu þjóðum em gefa sig fram. Bush forseti á heiður skilinn fyrir að skipa (einn allra stórveldaleiðtoga) konu, sem m.a.s. er ekki ‘hvít’, á stól utanríkisráðherra. En það talar skýrum stöfum um hugarástand vestrænna róttæklinga, að þegar risaveldið lætur verðleika konu ráða við stöðuveitingu, þá byrjar vinstra/frjálslyndis-fjölmiðlagengið að hlaða sín útbrunnu batterí með ófrægingarsögum af þessum nýja, ógnvænlega utanríkisráðherra! Þar er einfaldlega verið að búa í haginn fyrir áframhald rógsherferðar gegn því ríki sem hingað til hefur staðfastlegast bjargað þjóðum Evrasíu frá brúnum, svörtum, rauðum, japönskum og múslimskum yfirgangs- og útþensluöflum -- og það án þess að slá eign sinni á einn einasta ferþumlung lands til frambúðar.