Lið Hildar tapaði gegn Luleå

Hildur Sigurðardóttir og félagar hennar í Jämtland Basket máttu sætta sig við 23 stiga tap, 65-88, á heimavelli gegn Luleå Basket í sænsku úrvalsdeildinni í körfubolta á laugardaginn. Jämtland tapaði þarna sínum fjórða leik í röð og er komið niður í 9. sæti deildarinnar. Hildur stóð fyrir sínu í leiknum, skoraði 10 stig, tók 8 fráköst og gaf 7 stoðsendingar en hitti þó ekki nógu vel því 5 af 23 skotum hennar fóru rétta leið. Bandaríski leikmaður liðsins, Dionne Brown, var stigahæst með 27 stig og 17 fráköst. Keith Vassell lék einnig sinn fyrsta leik með karlaliði Jämtland í 66-77 tapleik gegn botnliði 08 Stockholm Human Rights.