Osama setur strik í reikninginn

Öryggismál eru aftur komin efst á listann, í Bandarísku forsetakosningunum, eftir að birt var myndband með Osama bin Laden, þar sem hann hótar fleiri árásum á Bandaríkin. Myndbandið með Osama bin Laden, hefur valdið uppnámi í kosningabaráttunni í Bandaríkjunum. John Kerry sakaði George Bush um að eiga sök á því að bin Laden gengur enn laus, þar sem hann hafi falið afgönskum hermönnum að hafa upp á honum. Bush svaraði því til að þetta væri hinn ómerkilegasti málflutningur, og til skammar að nota helsta óvin Bandaríkjanna til þess að koma höggi á forseta landsins. Bæði Bush og Kerry lýstu því yfir að þeir myndu elta Bin Laden uppi og annaðhvort handtaka hann, eða drepa. Þetta er í fyrsta skipti í meira en ár sem heyrst hefur beint frá bin Laden og í raun fyrsta sönnunin fyrir því að hann sé yfirleitt á lífi. Talið var mögulegt að hann hefði fallið í stórfelldum loftárásum bandaríkjamanna á Tora Bora fjallavirkið, á sínum tíma. Á myndbandinu má hinsvegar sjá að þessi eftirlýstasti hryðjuverkamaður heims er enn við heilsu og enn við sama heygarðshornið.