ESB í úlfakreppu

Evrópusambandið er í úlfakreppu eftir að Jose Manuel Barroso, tilvonandi forseti framkvæmdastjórnar sambandsins, hætti á síðustu stundu við að skipa nýja framkvæmdastjórn í dag. Fordómar í garð samkynhneigðra og einstæðra mæðra valda þessari kreppu. Til stóð að greiða atkvæði um skipan nýrrar tuttugu og fjögurra manna framkvæmdastjórnar Evrópusambandsins á fundi Evrópuþingsins en Jose Manuel Barroso, væntanlegur forseti framkvæmdastjórnar ESB, hætti við að leggja fram tillögu um skipan stjórnarinnar þar sem hann taldi ljóst að þingið myndi hafna tillögunni. Áform Barrosos um að skipa Ítalann Rocco Buttiglione, dómsmálastjóra ESB, ollu gríðarlegum titringi innan Evrópuþingsins en um það bil helmingur þingsins hafði lýst andstöðu sinni við skipan hans vegna fordóma hans í garð samkynhneigðra og einstæðra mæðra. Barosso óttaðist um afleiðingarnar en Buttiglione hefur meðal annars sagt samkynhneigð vera synd. Evrópuþinginu, sem kemur næst saman til fundar 15. nóvember næstkomandi, hefði þó ekki dugað að fella Buttiglione einan því vegna reglna verður það annað hvort að samþykkja eða hafna framkvæmdastjórninni í heild. Barroso tekur því ekki við embætti forseta framkvæmdastjórnar Evrópusambandsins 1. nóvember næstkomandi, eins og áformað var, þegar kjörtímabil Romano Prodis, núverandi forseta, rennur út. Vegna þeirrar úlfakreppu sem sambandið er nú í hefur Prodi fallist á að gegna embættinu enn um sinn, eða þar til samkomulag næst um nýja framkvæmdastjórn.