Barosso óttast höfnun

Jose Manuel Barosso, tilvonandi forseti framkvæmdastjórnar Evrópusambandsins, segir sambandið komið í uppnám ef Evrópuþingið hafnar 24 manna framkvæmdastjórn hans, eins og töluverðar líkur eru á. Sérstaklega er það tilnefning Ítalans Rocco Buttiglione sem yfirmanns dómsmála, sem fer fyrir brjóstið á þingmönnum Evrópu, enda er Buttiglione einarður andstæðingur samkynhneigðra og vægast sagt íhaldssamur þegar kemur að samskiptum kynjanna. Barosso ætlar þó hvergi að kvika frá upphaflegu vali sínu, enda segir hann ekki hægt að velja 24 menn í framkvæmdastjórnina sem fullkomin sátt ríkti um. Fari svo að þingið hafni vali Barroso, mun núverandi forseti framkvæmdastjórnarinnar, Romano Prodi leiða bráðabirgðarstjórn uns lausn finnst.