Fjórir látnir og 400 slasaðir

Fjórir hið minnsta létust og 400 slösuðust í jarðskjálftunum sem riðu yfir Japan í dag. Auk þess er talið að a.m.k. fimm manneskjur séu grafnar undir rústum. Fyrsti skjálftinn reið yfir Tókýó í morgun og reyndist hann 6,8 að styrkleika. Hann átti upptök sín um 250 kílómetra norður af borginni. Engar skemmdir munu hafa orðið í fyrsta skjálftanum, enda eru byggingar í Japan reistar með hliðsjón af því að jarðskjálftar eru mjög tíðir. Nokkru síðar riðu öflugir eftirskjálftar yfir og ollu skemmdum og slysum á fólki. Þó að eftirskjálftarnir hafi ekki verið jafn kraftmiklir og fyrsti skjálftinn virðist sem afleiðingar þeirra séu alvarlegri. Lest fór út af sporinu, skriður féllu, hraðbraut rofnaði og rafmagnslínur slitnuðu.