Á skjáinn upp úr áramótum

Sjónvarpið hefur tryggt sér sýningarrétt á þáttunum um Latabæ (eða Lazytown). Gengið var frá samningum um miðja vikuna í höfuðstöðvum Latabæjar í Garðabæ, þar sem þættirnir eru teknir upp. Hluti þáttanna hefur verið sýndur í Bandaríkjunum og hafa vakið mikla athygli og að sögn náð til milljóna áhorfenda. Þættirnir eru sagðir vinsælasta barnaefni sem þar er í boði fyrir aldurshópinn frá tveggja til ellefu ára. "Þættirnir eru eitt stærsta verkefni sem Íslendingar hafa ráðist í á þessu sviði. Ráðgert er að hefja sýningar á þáttunum á Íslandi upp úr áramótum. Þættirnir, sem voru teknir upp á ensku, verða talsettir á íslensku fyrir sýningu í Sjónvarpinu," segir í tilkynningu Sjónvarpsins. Undir samninginn rituðu Bjarni Guðmundsson, framkvæmdastjóri Sjónvarpsins og Magnús Scheving, sjálfur íþróttaálfurinn. Viðstaddur var bæjarstjórinn í Latabæ og fleiri góðir gestir.