Útnefningarhátíð í skugga mótmæla

Á þriðja þúsund þingfulltrúar, fimmtán þúsund blaðamenn og tugþúsundir mótmælenda eru komin til New York þar sem flokksþing repúblikana hefst í dag. Með því má segja að kosningabarátta George W. Bush Bandaríkjaforseta hefjist formlega en hann verður formlegur útnefndur forsetaefni repúblikana á fimmtudag, lokadegi þingsins. Repúblikanar leggja upp með að lýsa Bush sem öflugum leiðtoga sem leiddi þjóðina í gegnum hörmungarnar sem riðu yfir með hryðjuverkaárásunum 11. september 2001. Bush sjálfur eftirlætur öðrum sviðið fyrstu dagana og hefur verið á kosningaferðalagi síðustu daga. Hann mun hins vegar flytja aðalræðuna. Þar er hann sagður leggja áherslu á næstu fjögur ár eftir kosningarnar í nóvember, hvernig Bandaríkin á seinna kjörtímabili hans verði. Baráttan gegn hryðjuverkum er fulltrúum á flokksþinginu ofarlega í huga en 62 prósent þeirra nefna hana sem eitt af þremur mikilvægustu verkefnum nýrrar ríkisstjórnar að loknum kosningum í skoðanakönnun AP-fréttastofunnar. 56 prósent nefndu efnahagsmál og fjórðungur skattamál. Þegar afstaða þingfulltrúa til ákveðinna málaflokka var skoðuð kom í ljós að 72 prósent eru andvíg hjónaböndum samkynhneigðra en aðeins þrjú prósent hlynnt þeim. 58 prósent eru andvíg réttinum til fóstureyðingar en fimmtán prósent fylgjandi. Mikið hefur verið um mótmæli í New York síðustu daga og er gert ráð fyrir að þau haldi áfram þar til flokksþinginu lýkur. Í gær tóku tugþúsundir manna þátt í mótmælagöngu á Manhattan þar sem stríðinu í Írak var mótmælt og þess krafist að Bandaríkjaher yrði kallaður heim. Mótmælin beinast að margvíslegum málefnum. Sumir berjast fyrir rétti innflytjenda, aðrir fyrir rétti samkynhneigðra og enn aðrir fyrir heilbrigðisþjónustu fyrir alla. Þá hefur verið vakin athygli á málefnum Palestínumanna og þess krafist að bundinn verði endi á ofsóknir í Súdan.