Sílikonbrjóst valda heilaskaða

Þá er það staðfest; sílikonbrjóst geta valdið heilaskaða. Komið hefur í ljós að allt að þrisvar sinnum meira magn af þungmálminum platínu, öðru nafni hvítagulli, finnst í líkama þeirra kvenna sem hafa látið stækka brjóstin á sér með sílikoni. Og eins og það sé ekki nóg, þá berst efnið líka í börn sem þessar konur eignast og hafa á brjósti. Platína finnst í einhverju magni í öllum en sérstakt form efnisins er notað í brjóstastækkunarpúða til að brjóstin virðist eðlilegri. Þetta afbrigði platínu finnst aðeins í sílikonkonum og því meira magn eftir því sem konurnar hafa verið lengur með gervibrjóstin. Víðast hvar er nú bannað að nota óbeislað sílikon í brjóstastækkanir sökum þess að efnið átti það til að leka út í líkama kvennanna. Hérlendis eru til að mynda notaðir sérstyrktir sílikonpúðar sem leka mjög sjaldan. Vísindamenn segja hins vegar að áhrifin af þessari platínumengun geti verið skelfileg. Málmurinn gengur í samband við taugaenda og veldur nokkurs konar skammhlaupi í taugakerfinu og heilanum þannig að skynjun fólks brenglast. Sumar konur hafa tekið upp einhvers konar kæki, eiga í erfiðleikum með að lesa og skrifa eða þá að heyrn þeirra og sjón versnar. Í verstu tilfellum, segja vísindamennirnir, veldur málmurinn svo mikilli brenglun að konurnar geta verið að horfa á græna fleti en talið sig sjá eitthvað allt annað, til að mynda fullt tungl. Þá er það spurningin; hvort kemur á undan, eggið eða hænan?