Nicholas Cage í Keflavík

Bandaríski kvikmyndaleikarinn Nicholas Cage sást á Keflavíkurflugvelli fyrir skömmu. Á vef Víkurfrétta kemur fram að einkaþota leikarans hafi millilent til að taka eldsneyti og mat á leiðinni frá Ítalíu til Bandaríkjanna. Með honum í för voru margir fjölskyldumeðlimir, meðal annars sonur hans og barnsmóðir ásamt bróður Cage og fjölskyldu hans. Þau höfðu stutta viðkomu en í stuttu spjalli við Kristján Inga Þórðarson, starfsmann IGS-flugþjónustunnar, og félaga hans spurði hann meðal annars hvers vegna Kevin Costner væri svo oft hér á landi og hvað hann væri að gera. Cage hafði mikinn áhuga á Íslandi og hafði greinilega kynnt sér málið að því er segir á vef Víkurfrétta. Hann sagðist örugglega koma aftur og þá stoppa lengur en reiknaði frekar með að koma að hausti til því dagbjartar sumarnætur væru honum ekki að skapi. Á myndinni má sjá Kristján Inga og Cage í Keflavík fyrr í dag. Myndin er birt með góðfúslegu leyfi Víkurfrétta.