KR fallið úr keppni

"Það sem okkur vantar er einhver til að klára færin. Okkur skortir slagkraft í fremstu víglínu og það varð okkur að falli í dag," sagði Willum Þór Þórsson, þjálfari KR, að leik Shelbourne og KR loknum í gærkvöld. Samanlögð úrslit leikjanna tveggja eru því 2-2 og fara Írarnir áfram á þeim mörkum sem þeir skoruðu á KR-velli í fyrri leik liðanna. Það er því ljóst að dýrkeypt sex mínútna einbeitingarleysi á lokamínútum fyrri leiksins reyndist banabiti KR. "Þetta er að sjálfsögðu hundsvekkjandi en það þýðir ekkert að hengja haus. Við verðum bara að einbeita okkur að næsta leik sem er gegn Víkingi í deildinni á Sunnudag og horfa á jákvæðu hliðarnar úr leiknum. Við spiluðum vel í fyrri hálfleik og sumir minna leikmanna voru að gera virkilega góða hluti á vellinum," sagði Willum Þór, sem gerði nokkrar breytingar á sínu liði; Jökull Elísabetarson, Sigmundur Kristjánsson, Sölvi Davíðsson og Kjartan Henry Finnbogason komu allir inn í liðið á nýjan leik og Willum stillti upp í leikkerfið 4-4-2, þar sem Arnar Gunnlaugsson hafði það hlutverk að draga sig dýpra á völlinn og fá boltann í lappirnar. KR byjaði leikinn mjög vel og fékk Sölvi sannkallað dauðafæri strax á fjórðu mínútu leiksins sem hann brenndi af. KR-liðið var síst lakari aðilinn framan af fyrri hálfleik, vörnin traust og spilið út á velli gekk ágætlega. En Shelbourne komu mjög ákveðnir til leiks í síðari hálfleik, fóru að pressa leikmenn KR hærra upp á vellinum og náðu að loka vel á öll svæði. KR-ingar reyndu mikið langar sendingar fram völlinn þar sem miðverðirnir stæðilegu David Rogers og Jamie Harris áttu alla bolta gegn lágvaxni sóknarlínu KR. Á endanum var það Kristján Finnbogason sem bjargaði KR-ingum frá tapi með nokkrum góðum markvörslum. Bestu leikmenn KR voru varnarmenn liðsins, og þá sér í lagi Tékkinn Petr Podzemsky, sem steig vart feilspor í leiknum. Þá var Kristján Finnbogason öryggið uppmálað í markinu.