26 á leið á Ólympíuleikana

Það styttist óðum í að Ólympíuleikarnir hefjist í Aþenu í Grikklandi en 28. Ólympíuleikar sögunnar verða settir þar 13.ágúst næstkomandi. Nokkuð góð mynd er að komast á íslenska hópinn og í dag hafa 26 íslenskir íþróttamenn náð þeim lágmörkum sem til þarf til að komast á leikana. Á leikana í Syndey fyrir fjórum árum fóru 18 íslenskir keppendur, allir í einstaklingsgreinum en ellefu einstaklingsíþróttamenn hafa nú unnið sér sæti í íslenska Ólympíuliðinu. Af þessum 26 sem eru komnir inn nú eru 15 handknattleiksmenn sem mega vera skráðir til leiks en Guðmundur Guðmundsson, landsliðsþjálfari hefur þó enn ekki ákveðið lokahóp sinn á leikunum. Tuttugu leikmenn berjast þar ennþá um þessi sæti sem eru laus í liðinu. Sjö sundmenn hafa náð að synda undir settum lágmörkum og tveir frjálsíþróttamenn, þau Þórey Edda Elísdóttir og Jón Arnar Magnússon hafa náð lágmörkum í sínum greinum. Rúnar Alexandersson keppir í fimleikum en hann náði að tryggja sig inn á leikana á Heimameistaramótinu í ágúst 2003 og Hafsteinn Ægir Geirsson mun keppa í siglingum, en hann fékk boð um það á dögunum frá Alþjóða Siglingasambandinu. Vonir eru bundnar við að fjölgað gæti í hópnum því sundmenn hafa frest til dagsins í dag til að ná sínum lágmörkum og frjálsíþróttamenn hafa frest til 9. ágúst til að ná sínum lágmörkum. Með þessum 26 íþróttamönnum munu fara 19 aðstoðarmenn; fararstjórar, flokksstjórar, læknir, sjúkraþjálfarar, sálfræðingur, þjálfarar og aðstoðarþjálfarar. Fararstjórn ÍSÍ ásamt flokksstjórum og þjálfurum hefur í allan vetur haldið reglulega fundi til að, bæði miðla upplýsingum og eins til að efla samstöðu innan hópsins og hefur það gengið vel. Ólympíuleikarnir í Sydney voru mjög minnisstæðir því þar varð Vala Flosadóttir fyrsta konan og aðeins þriðji íslenski íþróttamaðurinn til að vinna til verðlauna á Ólympíuleikum þegar hún vann brons í stangarstökki. Vilhjálmur Einarsson vann silfur í þrístökki í Melbourne 1956 og Bjarni Friðriksson vann brons í júdó í Los Angeles fyrir tuttugu árum síðan. Íslenskir íþróttamenn á ÓL í Aþenu: Handknattleikur: Íslenska karlalandsliðið - Keppendur 15 Fimleikar: Rúnar Alexandersson Frjálsíþróttir: Jón Arnar Magnússon og Þórey Edda Elísdóttir Sund: - Keppendur 7 - Örn Arnarson (50m skriðsund, 100m skriðsund, 100m baksund, 100m flugsund, 200m fjórsund) - Jakob Jóhann Sveinsson (100m bringusund, 200m bringusund) - Íris Edda Heimisdóttir (100m bringusund) - Kolbrún Ýr Kristjánsdóttir (50m skriðsund, 100m skriðsund, 100m flugsund) - Lára Hrund Bjargardóttir (200m skriðsund, 200m fjórsund) - Ragnheiður Ragnarsdóttir (50m skriðsund, 100m skriðsund) - Hjörtur Már Reynisson (100m flugsund) Siglingar: Hafsteinn Ægir Geirsson   Fjöldi íslenskra keppenda á síðustu tíu leikjum: Sydney 2000 18 (Flestir í sundi - 9) Atlanta 1996 9 (Flestir í sundi og frjálsum - 3) Barcelona 1992 30 (Flestir í handbolta - 16) Seoul 1988 30 (Flestir í handbolta - 16) Los Angeles 1984 30 (Flestir í handbolta - 15) Moskva 1980 9 (Flestir í frjálsum - 4) Montreal 1976 13 (Flestir í frjálsum - 7) Munchen 1972 26 (Flestir í handbolta - 16)