Rannsaka misnotkun á heyrnarlausum

Berglind Stefánsdóttir, formaður Félags heyrnarlausra, vill að fram fari opinber rannsókn á hversu stór hópur heyrnarlausra barna hafi verið beittur kynferðislegu ofbeldi. Heyrnarlaus maður fékk mildari refsingu í Héraðsdómi Reykjavíkur fyrir kynferðisbrot gegn dætrum sínum vegna þess að hann var talinn hafa sætt slíkum brotum reglulega frá níu til sautján ára aldurs þegar hann var í heimavistarskóla fyrir heyrnarlausa. Í dómnum kemur fram að svo virðist sem enn fremur hafi verið brotið með sama hætti gegn mörgum skólafélaga hans. Berglind Stefánsdóttir segir í viðtali við Fréttablaðið í dag að rökstuddur grunur sé um kynferðisbrot gegn heyrnarlausum börnum hér á landi. Margir búi yfir þessari reynslu og því sé mjög mikilvægt að málið verði skoðað.