Madonna leiðbeinir ungdómnum

Madonna hefur verið iðin við kolann því auk þess að senda frá sér nýjan disk og halda tónleikaferðalag hefur hún lokið við sína þriðju barnabók, "Yakov og þjófana sjö". Bókin kom út í Bandaríkjunum og víða annars staðar 21. júní en íslensk börn þurfa ekki að bíða hennar lengi því hún er væntanleg innan skamms eða 7. júlí í þýðingu Silju Aðalsteinsdóttur. Bókin hefur fengið ágætar viðtökur og hafa gagnrýnendur meðal annars látið þau orð falla að um bestu bók Madonnu sé að ræða til þessa. Yakov og þjófarnir sjö er þess utan glæsilega myndskreytt af Gennady Spirin, margverðlaunuðum listamanni af rússneskum ættum sem búsettur er í Bandaríkjunum. Sagan gerist í litlum bæ í Austur-Evrópu á 18. öld og segir frá Yakov skósmið, konur hans Olgu og einkasyninum sem er fárveikur. Yakov örvæntir í veikindum sonar síns og leitar til manns í útjaðri bæjarins sem talinn er geta gert kraftaverk og biður hann um hjálp. Sér til aðstoðar kallar vitri maðurinn á alla þjófa og ribbalda bæjarins öllum til mikillar furðu. Í kringum þessa atburði spinnst óvænt og skemmtileg atburðarás. Þetta er þriðja barnabók söngkonunnar af fimm fyrirhuguðum en þær fjalla allar um málefni sem börn standa frammi fyrir að sögn Madonnu. Söngkonan vonast til að bækurnar geymi leiðsögn fyrir yngstu kynslóðina, hvernig þau eiga að ráða við vandasamar aðstæður og læra eitthvað af þeim. "Það er von mín að bækurnar segi börnum eitthvað sem þau geta notað sér - jafnvel fullorðnum börnum," lét Madonna hafa eftir sér. Fjórða barnabók Madonnu kemur út með haustinu og sú síðasta næsta vor. Áður útgefnar bækur er Ensku rósinar og Eplin hans Peabodys.