Fimmtán þúsund lítrar af majónesi

"Þetta er risastór majónesdolla, sú stærsta sinnar tegundar," segir Jóhannes Jóhannesson á auglýsingastofunni Frank og Jói, en þar var verið að leggja lokahönd á stærstu majónesdós í heimi. "Þetta er auglýsing fyrir Gunnars-mayonnaise sem á að standa út við þjóðveginn rétt hjá Þjórsárbrúnni. Lögreglan bannaði okkur að flytja dósina að degi til svo við keyrðum hana upp eftir í fyrrinótt á stórum kranabíl." Majónesdósin er þrír metrar á hæð og um fjórir metrar á breidd en lítur að öðru leyti út eins og venjuleg 500 millilítra majónesdós. "Dósin er smíðuð úr áli en merkingarnar eru úr endurskini svo þær sjást í myrkri þegar bílaljósin lýsa í átt að henni. Við höfum einu sinni áður útbúið hlut af þessari stærðargráðu en það var málningardós sem stendur í Byko. Málningardósin nær þó ekki að vera jafnstór og majonesdósin." Aðspurður um hvort ekki eigi að koma dósinni í Heimsmetabók Guinness segir Jóhannes. "Við höfum reynt það en til þess að komast í bókina þyrfum við að fylla dósina af majónesi. Það eru 15 þúsund lítrar af majónesi (sem jafngildir jafn mörgum þúsundum lítra af fitu) sem við þyrftum þá að setja ofan í hana. Ansi margar milljónir af samlokum og kokteilsósum með frönskum kartöflum það og okkur fannst tilhugsunin ekkert mjög freistandi."