Melódískt popprokk

"Þetta er svona melódískt kántrískotið popprokk," segir Sigurjón Brink, gítarleikari, söngvari og lagahöfundur hljómsveitarinnar The Flavors, þegar hann er beðinn um að lýsa tónlist hljómsveitarinnar. Í kvöld verður hljómsveitin með útgáfutónleika á Grand Rokk í tilefni útkomu fyrstu plötu hennar, sem hlotið hefur nafnið Go Your Own Way. Meðlimir auk Sigurjóns eru Pálmi Sigurhjartarson píanóleikari, Benedikt Brynleifsson trommuleikari, Matthías Stefánsson gítarleikari og Jón Bjarni Jónsson bassaleikari. "Við höfum verið starfandi í svona eitt og hálft ár, en erum að koma undan feldi þessa dagana með tólf laga plötu."