Rödd yðar á plötu

Kvæðamannafélagið Iðunn fagnar 75 ára afmæli á morgun, miðvikudaginn 15. september. Af því tilefni verður efnt til hátíðar í Borgarleikhúsinu annað kvöld klukkan 20.00. Hátíðin er um leið útgáfutónleikar á silfurplötum sem teknar voru upp í Bankastræti 7 á árunum 1935-36. "Við höfum lengi verið að vinna að útgáfu á þessum silfurplötum sem Atli Ólafsson, sonur Ólafs Friðrikssonar í Hljóðfærahúsinu, sá um upptökur á," segir Steindór Andersen, forsvarsmaður Iðunnar. "Á þessum tíma gat hver sem er hljóðritað hvað sem er. Um það birtust meðal annars auglýsingar í Alþýðublaðinu með slagorðum eins og "Rödd yðar á plötu" og "Allir á plötu". Meðal annars kom fram í einhverjum af þessum auglýsingum að nú gæti fólk hljóðritað hljóðin í ungbarninu sínu og spilað seinna þegar það færi að skoða myndir af barninu. Þarna var strax komin hugmyndin að margmiðlun. Menn máttu líka sjá þetta sem sendibréf, vegna þess að þetta var ódýrt. Platan kostaði fjórar krónur en miði á tónleika kostaði kr. 3,50 í stúku í Gamla bíói. Núna sá Kvæðamannafélagið Iðunn sér leik á borði að gefa út það sem við höfðum safnað af þessum hljóðritunum. Við létum vinna fimmtíu plötur inn á fjóra geisladiska. Á hverri plötu eru fjögur lög, þannig að alls eru þetta 200 lög sem flutt eru af þrettán kvæðamönnum. Flestir þeirra eru úr Húnaþingi. Það þýðir þó ekki að það hafi ekki verið kvæðamenn annars staðar á landinu, heldur var þetta hópurinn sem var starfandi í Kvæðamannafélaginu Iðunni á sínum tíma og tengdist sterkustu böndunum." Með geisladiskunum fjórum fylgir bók með textum, nótnaskrifum og öllum nauðsynlegum upplýsingum um efni þeirra. Útgefandi er Smekkleysa en Gunnsteinn Ólafsson er ritstjóri verksins. Efnisskrá útgáfu- og afmælishátíðarinnar í Borgarleikhúsinu verður fjölbreytt. Kvæðamenn kveða ýmis dæmi af þeim stemmum sem er að finna á diskunum, kórinn Sunnan heiða flytur útsetningu Gunnsteins Ólafssonar á rímnalögum, Chris Foster og Bára Grímsdóttir flytja þjóðlög og hljómsveitin Sigur Rós spilar rímnalög með Steindóri. Hilmar Örn Hilmarsson flytur Breiðfirðingavísur með Kristínu Heiðu Kristinsdóttur, auk þess sem hagyrðingar mæta á svæðið. Kynnir kvöldsins verður Eva María Jónsdóttir. En verður dagskráin ekki tekin upp í tilefni af þessum merku tímamótum? "Jú," segir Steindór. "Ástralska sjónvarpið ætlar að taka hátíðina upp."