Oftast af stað innan mínútu

Liðsmenn í slökkviliði höfuðborgarsvæðisins eru venjulega lagðir af stað í útkall innan við sextíu sekúndum frá því neyðarkall berst. Við venjulegar kringumstæður tekur ekki meira en fimm mínútur fyrir sjúkrabíla að komast á vettvang. Að sögn Jóns Viðars Matthíassonar aðstoðarslökkviliðsstjóra fara fram mælingar á viðbragðshraða slökkviliðsins og niðurstöðurnar ræddar mjög reglulega. "Viðbragðstíminn er skoðaður frá degi til dags og verður alltaf styttri og styttri," segir Jón Viðar. Allt mælt Hann segir að slökkvi- og sjúkralið í borgum miði oftast við að viðbragðstími sé sextíu eða níutíu sekúndur og að það sé góður árangur að geta miðað við lægri mörkin. Viðbragðstímanum er skipt upp. Þannig sé sérstaklega mælt hve langur tími líði frá því að símtal berst og þangað til búið sé að senda viðbragðssveit af stað, einnig er mælt hve langan tíma það tekur slökkviliðið sjálft að fara af stað og eins hversu lengi sjúkra- og slökkviliðsbílar eru að komast á áfangastað. Starfsmenn Neyðarlínu vel þjálfaðir Að sögn Jóns Viðars skiptir miklu að starfsmenn Neyðarlínunnar séu orðnir mjög þjálfaðir í að bregðast við og geti í flestum tilfellum greint ástandið hratt. "Neyðarlínufólkið er búið að ná mikilli tækni í að lesa hvað fólk er að segja og skilja og er vel tæknilega búið til að boða út aðila," segir hann. Þá segir Jón Viðar það hjálpa til hversu margir í samfélaginu séu þjálfaðir í fyrstu hjálp og geti bæði orðið fórnarlömbum slysa til aðstoðar áður en hjálp berst og einnig gefið Neyðarlínunni haldgóðar upplýsingar um ástand á vettvangi. "Ef útköllin eru flókin þá tefst þessi þáttur þar sem það þarf meiri greiningarvinnu. Þess vegna er afskaplega mikilvægt að fólk sem hringir inn sé hnitmiðað við að koma skilaboðum áleiðis," segir hann. Keppnisharka í slökkviliðinu Jón Viðar segir að starfsmenn slökkviliðsins séu þrautþjálfaðir og hjá þeim ríki mikið keppnisskap. Því sé sífellt stefnt að því að bæta viðbragðstímann og ef sá tími er lengri en menn sætta sig við þá er hvert tilvik rannsakað. "Þetta eru svakalegir keppnismenn og mikið af öflugum íþróttamönnum," segir Jón Viðar og vaktirnar keppast innbyrðis um að ná sem mestum árangri. Miklu skipti einnig að starfsmannavelta hjá slökkvliðinu sé lítil þannig að starfsmenn búa að mikilli reynslu og þekkingu. Þegar sjúkrabílar eru kallaðir út sjá starfmenn slökkviliðsins á tölvuskjá hvar bílar eru og geta því tekið ákvörðun um hvern skuli senda á vettvang. Oft eru tveir sendir af stað en sá sem er lengur á leiðinni kallaður til baka. Þegar umferðarþungi er mikill er reynt að fara eftir fáfarnari götum en almennt segir Jón Viðar að ökumenn séu mjög meðvitaðir um að veita sjúkraflutningabílum forgang. Ökumenn tillitssamir "Það koma auðvitað dagar þar sem manni finnst þetta ganga bölvanlega en þegar maður horfir á þetta í heild sinni þá finnst mér að fólk sé afskaplega meðvitað um að við þurfum forgang og það finnst mér mjög jákvætt," segir Jón Viðar. Þegar umferð er þung er erfiðara fyrir sjúkrabíla að komast leiðar sinnar auk þess sem vandræði skapist stundum á flóknum gatnamótum þegar aðrir vegfarendur eru óöryggir um hvernig þeir geti liðkað um fyrir sjúkrabílunum.