70 mínútur hætta á Popptíví

Sjónvarpsþátturinn 70 mínútur verður tekinn af dagskrá Popptíví þann 20. desember en þá verður eitt þúsundasti þátturinn sýndur. Það þýðir að einungis 68 þættir eru eftir af þessum vinsælasta sjónvarpsþætti ungu kynslóðarinnar. "Það var sameiginleg ákvörðun að hætta með þáttinn. Við höfum verið með mikla endurnýjun og strákarnir vildu reyna fyrir sér annars staðar. Þetta hefur gerst áður samanber Simma og Jóa í Idolinu," sagði Steinn Kári Ragnarsson, dagskrárgerðarstjóri Popptíví, í samtali við Fréttablaðið í gær. 70 mínútur hafa verið lang vinsælasti dagskrárliður Popptíví en samkvæmt síðustu Gallup-könnun var 8,8% uppsafnað áhorf á þáttinn. Næsti dagskrárliður á eftir var The Joe Schmo Show, með 4,4% uppsafnað áhorf. "Við gerðum samning út árið og hann er að renna út þannig að vildum skoða okkar möguleika," sagði Auðunn Blöndal, einn þremenninganna. Hann vildi þó ekki gefa upp hvað þeir félagar hyggjast gera þegar 70 mínútur renna sitt skeið. Þremenningarnir stefna þó að því að reyna að vinna saman þegar þar að kemur. "Þátturinn er búinn að vera í loftinu í fjögur ár samfleytt. Okkur og stjórnendum Popptívi fannst kominn tími á breytingar. Það er enginn fýla í gangi eða neitt svoleiðis," sagði Auðunn. Strákarnir í 70 mínútum hafa ekki setið auðum höndum síðustu mánuði. Auk þess að stýra sjónvarpsþættinum léku þeir í nýrri Svínasúpu og hafa tekið upp lag í samvinnu við hljómsveitina Quarashi. Innan skamms munu þeir svo gera myndband við lagið, sem ber nafnið Crazy Bastard, en Samúel Bjarki Pétursson mun leikstýra því. Handritið er í vinnslu en lagið verður ekki frumflutt fyrr en myndbandið er tilbúið.