Sund getur valdið astma

Börn sem eru mikið í sundi eru líklegri en önnur börn til að fá astma samkvæmt rannsókn sænskra sérfræðinga. Þeir vara sérstaklega við ungbarnasundi þar sem klórinn geti skaðað ónæmiskerfi barnanna. Það voru vísindamenn við háskólann í Umeo í Norður-Svíþjóð sem könnuðu tengslin á milli mikillar sundiðkunar barna og astma en við rannsóknina var fylgst með tæplega 60 níu ára gömlum börnum í ákveðinn tíma. Um helmingur barnanna fór í sund að minnsta kosti einu sinni í mánuði. Vísindamennirnir komust að þeirri niðurstöðu að börn sem eru mikið í sundlaugum væru líklegri en önnur börn til að fá sýkingar af ýmsu tagi vegna veikara ónæmiskerfis líkamans. Þau væru þannig líklegri til að fá astma. Sænsku sérfræðingarnir röktu þetta beint til klórsins í sundlaugunum sem þeir sögðu að hefði slæm áhrif á ónæmiskerfið. Þeir benda á að klórgufur í sundlaugunum aukist til muna þegar klórblandað vatnið bregst við húð og svita. Þegar börnin andi að sér gufunum skaði það lungnafrumur, svokallaðar clara-frumur, sem verji þau gegn sýkingum. Í rannsókninni kom í ljós að hjá þeim börnum, sem fóru reglulega í sundlaugar þar sem klór var mikill, reyndist minna magn af clara-frumum í blóðinu en hjá börnum sem ekki fóru eins mikið í sund. Í niðurstöðum rannsóknarinnar er varað sérstaklega við ungbarnasundi þar sem börn sem séu í slíku séu svo lítil og ónæmiskerfi líkama þeirra viðkvæmt.