Hver verður arftaki De Gea hjá Man Utd? | Sjö kostir

Um fátt hefur verið rætt meira síðustu daga en möguleg vistaskipti markvarðarins Davids De Gea.

De Gea, sem var í gær valinn leikmaður ársins hjá Manchester United, hefur ítrekað verið orðaður við Real Madrid og bendir margt til þess að hann sé á förum frá Manchester.

En hverjir gætu tekið stöðu hans í marki United?

Sjá einnig: Fyrrverandi markvörður Man Utd: Valdes fullkominn kostur.

Í grein sem birtist á ESPN í dag veltir John Brewin þeirri spurningu fyrir sér en hann tiltekur sjö mögulega arftaka Spánverjans á Old Trafford.

Victor Valdes, Manchester United

Samdi við United í byrjun árs og lék sinn fyrsta leik fyrir félagið gegn Arsenal um helgina. Býr yfir mikilli reynslu og vann allt sem hægt var að vinna með Barcelona. Myndi ráða við pressuna á Old Trafford.

Petr Cech, Chelsea

Er á förum frá Chelsea eftir að hafa misst sæti sitt í liðinu til Thibaut Courtois. Gæti komið með sömu reynslu og fagmennsku inn í lið United og Edwin Van Der Sar gerði fyrir tíu árum.

Hugo Lloris, Tottenham

Hefur verið hjá Spurs í þrjú ár en vill væntanlega fara að spila í Meistaradeildinni á ný eftir að hafa spilað þar með Lyon um árabil. Hefur verið orðaður við PSG en United væri spennandi kostur fyrir hann.

Bernd Leno, Bayer Leverkusen

Hefur átt frábært tímabil með Leverkusen og verið orðaður við stærri lið. Gæti komið til United ásamt öðrum Þjóðverja, miðverðinum Mats Hummels.

Samir Handanovic, Internazionale

Á aðeins eitt ár eftir af samningi sínum við Inter sem er að fara í enduruppbyggingu. Inter gæti selt Slóvenann ef félagið fær Asmir Begovic, markvörð Stoke City.

Jan Oblak, Atletico Madrid

Sýndi hvers hann er megnugur þegar Benfica komst í úrslitaleik Evrópudeildarinnar í fyrra. Hefur spilað fyrir Atletico Madrid í Meistaradeildinni í vetur og frammistaða hans í leikjunum gegn Real Madrid í átta-liða úrslitunum vakti mikla athygli.

Jesper Cillessen, Ajax

Spilaði undir stjórn Louis Van Gaal hjá hollenska landsliðinu og gæti farið sömu leið og Daley Blind og Memphis Depay. Vann einnig með markmannsþjálfara United, Frans Hoek, hjá landsliðinu. Ajax er tregt til að selja Cillessen en tilboð upp á 25 milljónir punda gæti fengið þá til að skipta um skoðun.