Leikur Bandaríkjamanna og Ítala að hefjast

Ítalir hafa fengið Gianluca Zambrotta aftur inn í byrjunarliðið og Francesco Totti er heill heilsu og byrjar inn á. Bandaríkjamenn gera tvær breytingar á liði sínu Clinton Dempsey og Carlos Bocanegra koma inn fyrir DaMarcus Beasley and Eddie Lewis.

Staðan í hálfleik 10-12 fyrir Svía

Svíar eru yfir 10-12 í hálfleik gegn Íslendingum í Höllinni. Hraðaupphlaup Íslands hafa gengið vel en sóknarleikurinn er stirður.

Ganamenn sigra Tékka 2-0

Ganamenn hafa borið sigurorð af Tékkum 2-0 á HM í Þýskalandi. Asamoah Gyan skoraði strax á annari mínútu og Sulley Muntari bætti seinna markinu við á 82. mínútu. Þetta verða að teljast óvæntustu úrslit HM hingað til en sigurinn var sanngjarn.

Ganamenn klúðra fyrsta vítinu á HM

Asamoah Gyan leikmaður Gana var rétt í þessu að skjóta í stöng úr vítaspyrnu sem hefði komið Gana tveimur mörkum yfir. Tékkar sluppu því með skrekkinn. Tomas Ujfalusi leikmaður Tékka var rekinn af leikvell. Tékkar leika því einum færri.

Styttist í leikinn stóra

Einn mikilvægasti handboltaleikur Íslandssögunnar er nú að hefjast í höllinni. Íslendingar og Svíar berjast um að komast á HM í handbolta sem haldið verður í Þýskalandi árið 2007. Það má reikna með að það verði glæsilegasta handboltamót sem haldið hefur verið.

Óvænt staða í hálfleik

Ganamenn eru óvænt yfir 1-0 í hálfleik gegn Tékkum í leik þjóðanna á HM. Það var Asamoah Gyan sem skoraði á Annari mínútu leiksins eftir fyrirgjöf frá Stephen Appiah.

Leikur Tékklands og Gana að hefjast

Þeir Milan Baros og Jan Koller, framherjar Tékka eru báðir meiddir og leika því ekki á móti Gana. Hinn leikreyndi Vratislav Lokvenc sem er 32 ára gamall byrjar líklega inn á og verður þá einn í framlínunni.

Portúgalar komir áfram

Leik Portúgal og Íran er lokið. Portúgalar unnu 2-0 með mörkum frá Deco á 63. mínútu og Cristiano Ronaldo á 80. mínútu leiksins. Portúgalar voru frekar ósannfærandi í leiknum en kláruðu verkefnið og eru því komnir áfram upp úr D riðli.

Portúgal 2 - Íran 0

Cristiano Ronaldo skoraði annað mark Portúgala úr vítaspyrnu.

Portúgalar komnir yfir

Staðan í leik Portúgal og Íran er 1-0 fyrir Portúgal. Það var Deco, samherji Eiðs Smára í Barcelona sem skoraði markið með glæsilegu skoti fyrir utan vítateig.

Eiður Smári samdi við Barcelona

Fremsti knattspyrnumaður Íslands í dag, Eiður Smári Guðjohnsen, hefur samið við spænska stórliðið Barcelona til þriggja ára, en félagið er Spánar- og Evrópumeistari. Þar með lýkur sex ára veru Eiðs Smára hjá Chelsea þar sem hann átti farsælan feril.

HM leikir dagsins

Það eru þrír leikir á dagskrá á HM í dag. Fjörið byrjar klukkan 13.00 en þá leika Portúgal og Íran í D-riðli. Portúgalir tryggja sér áframhaldandi þátttöku með sigir en Íranir jafna þá að stigum með sigri og þá ráðast úrslitin í riðlinum ekki fyrr en á miðvikudag.

Aimar á leið til Zaragoza?

Svo virðist sem Pablo Aimar, leikmaður Valencia sé á leið til Real Zaragoza. Aimar sem er Argentínskur landsliðsmaður og hafa forráðamenn Valencia áhuga að gera nýjan samning við hann. Umboðsmaður hans segir að leikmaðurinn sé spenntur fyrir því að færa sig um set og ganga til liðs við Real Zaragoza.

Bierhoff vill forðast að fá Englendinga

Oliver Bierhoff, aðstoðarþjálfari þýska landsliðsins vill með öllu forðast að mæta enska liðinu í 16 liða úrslitum. Svo gæti farið að þessar tvær þjóðir geta mæst ef önnur lendir í fyrsta sæti og hin í öðru.

Cruyff ánægður með Van Basten

Hollenska goðsögnin, Johan Cruyff er mjög ánægður með Marco van Basten, landsliðsþjálfara hollendinga, Segir hann að liðið sé á rétti leið og Basten sé að gera hárétta hluti með það.

Jerry Stackhouse verður í banni í fimmta leiknum

Aganefnd NBA-deildarinnar hefur úrskurðað skotbakvörðinn Jerry Stackhouse hjá Dallas í eins leiks bann fyrir óíþróttamannslega villu hans á Shaquille O´Neal í fjórða leik liðanna í gærkvöldi. Þetta þýðir að Stackhouse mun missa af fimmta leik liðanna í Miami á sunnudagskvöld.

Markalaust hjá Mexíkó og Angóla

Angóla krækti í fyrsta stig sitt á HM í sögu landsins þegar því tókst að hanga á markalausu jafntefli við Mexíkó. Einum leikmanni Angóla var vikið af leikvelli þegar tíu mínútur voru til leiksloka, en þó Mexíkóar hafi verið sterkari aðilinn tókst liðinu ekki að skora mark.

Í fyrsta sinn sem allir varamenn skora mark

Argentínumennirnir Esteban Cambiasso, Carlos Tevez og Leo Messi komust í sögubækurnar í dag þegar þeir náðu allir að skora mark eftir að hafa komið inn sem varamenn í leiknum gegn Serbíu og Svartfjallalandi. Argentína vann leikinn 6-0 og sendi Serbana heim.

Engar afsakanir

Franski þjálfarinn Henri Michel var hundfúll í dag þegar ljóst var að lið hans væri á leið heim af HM eftir tap gegn Hollendingum. Hann segist ekki nenna að bjóða upp á afsakanir eða láta fólk vorkenna liðinu.

Markalaust hjá Angóla og Mexíkó

Enn hefur ekki verið skorað mark í leik Mexíkó og Angóla í D-riðlinum á HM. Mexíkó hefur verið sterkari aðilinn í leiknum, sem hefur verið frekar daufur, en þess verður eflaust ekki langt að bíða að komi mark í leikinn.

Þetta var gríðarlega erfiður leikur

Marco Van Basten viðurkenndi að leikurinn við Fílabeinsstrendinga í dag hefði verið gríðarlega erfiður, en hollenska liðið vann 2-1 sigur og hefur liðið því alltaf komist áfram upp úr riðlakeppni í þeim sex heimsmeistaramótum sem það hefur tekið þátt í. Þjóðverjar eru með hvað glæsilegastan árangur á þessu sviði, en liðið hefur alltaf farið áfram síðan riðlakeppninni var komið á árið 1954.

Meiðsli Rooney voru minni en talið var í fyrstu

Nú hefur skýrsla læknanna sem önnuðust Wayne Rooney á vegum Manchester United og enska landsliðið verið gefin út og í henni kemur margt forvitnilegt í ljós, eins og sú staðreynd að meiðsli Rooney voru alls ekki jafn alvarleg og haldið hefur verið fram í fjölmiðlum allar götur síðan hann meiddist fyrir rúmum sex vikum.

Mexíkó - Angóla hefst klukkan 19

Leikur Mexíkó og Angóla í D-riðli hefst nú klukkan 19. "Eyðimerkurrefurinn" Jared Borgetti getur ekki spilað með Mexíkóum vegna meiðsla, en stuðningsmenn liðsins eru í miklum meirihluta á leikvanginum í Hannover. Mexíkóar eiga góðar minningar frá þessum velli, þar sem lið þeirra náði að leggja Brasilíumenn í Álfukeppninni í fyrra.

Hollendingar áfram

Hollendingar mörðu 2-1 sigur á frískum Fílabeinsstrendingum í fjörugum leik liðanna í C-riðli. Hollendingarnir byrjuðu betur og komust í 2-0 með mörkum frá Robin Van Persie og Ruud Van Nistelrooy, en Bakari Kone minnkaði muninn fyrir Afríkuliðið. Hollendingar hafa því hlotið 6 stig í riðlinum líkt og Argentínumenn, en þjóðirnar eiga eftir að mætast í lokaumferðinni og þar kemur í ljós hvaða lið hreppir efsta sætið.

Englendinga skortir þolinmæði

Hinn reyndi þjálfari Leo Beenhakker hjá Trinidad og Tobago, segir að enska landsliðið verði að bæta sig verulega af það ætli sér að eiga vonarglætu um að komast langt á HM. Beenhakker var ekki hrifinn af spilamennsku liðsins gegn sínum mönnum í síðasta leik, þó enska liðinu hafi tekist að kreista út 2-0 sigur í lokin.

Tiger Woods í miklum vandræðum

Nú er útlit fyrir að Tiger Woods lendi í því í fyrsta skipti á ferlinum að komast ekki í gegn um niðurskurð á stórmóti í golfi. Woods er nýkominn til keppni á ný eftir frí vegna dauða föður hans og virkar mjög ryðgaður. Woods hefur spilað fyrstu tvo hringina á 76 höggum og er á 12 höggum yfir pari Winged Foot-vallarins.

Við eigum góða möguleika á að vinna HM

Framherjinn David Villa hjá spænska landsliðinu segir að liðið hafi alla burði til að verða eitt þeirra liða sem berjast um heimsmeistaratitilinn í byrjun næsta mánaðar. Villa var markahæsti heimamaðurinn í spænsku deildinni á síðasta tímabili, hefur skorað tvö mörk það sem af er HM og fjögur í sínum fyrstu níu landsleikjum.

Frábær fyrri hálfleikur í Stuttgart

Hollendingar hafa yfir 2-1 gegn Fílabeinsströndinni í leik liðanna í C-riðlinum á HM. Robin Van Persie og Ruud Van Nistelrooy skoruðu tvö mörk á 4 mínútum um miðbik hálfleiksins, en síðan hafa leikmenn Fílabeinsstrandarinnar verið stórhættulegir og Bakari Kone minnkaði muninn á 38. mínútu. Þá átti hinn eitraði Didier Zokora þrumuskot í þverslá hollenska marksins.

Viljum gjarnan forðast að mæta Englendingum

Oliver Bierhoff segir að þýska liðið vilji gera allt sem í valdi þess stendur til að vinna lokaleik sinn í A-riðlinum gegn Ekvador, því ef liðið hafnar í öðru sæti síns riðils, bendir allt til þess að það muni mæta Englendingum í 16-liða úrslitum.

Hollendingar í stuði

Hollendingar eru heldur betur í stuði gegn Fílabeinsströndinni í leik liðanna í C-riðli sem nú stendur yfir. Þegar hálftími er liðinn af leiknum hafa þeir hollensku náð 2-0 forystu. Robin Van Persie skoraði fyrsta markið beint úr aukaspyrnu á 23. mínútu og aðeins 4 mínútum síðar bætti Ruud Van Nistelrooy við góðu marki eftir frábæran undirbúning Arjen Robben.

Eitt versta tap í sögu okkar

Þjálfari Serba var skiljanlega eyðilagður eftir tapið stóra gegn Argentínumönnum í C-riðlinum á HM í dag. Hann segir að tap sinna manna verði lengi í minnum haft og sé eitt það versta á knattspyrnuvellinum í sögu þjóðarinnar.

Það er heiður að spila með svona liði

Hinn ungi framherji argentínska landsliðsins, Carlos Tevez, segir að liðsandinn hafi verið lykillinn að 6-0 stórsigri liðsins á Serbum og Svartfellingum í dag. Tevez kom inná sem varamaður í leiknum og skoraði ótrúlegt mark eftir einstaklingsframtak.

Holland - Fílabeinsströndin næstur á dagskrá

Hollendingar mæta með óbreytt lið til leiks í Stuttgart í dag frá sigurleiknum gegn Serbum í upphafi móts, en þrjár breytingar hafa verið gerðar á byrjunarliði Strandamanna. Arouna Kone kemur inn í framlínu liðsins við hlið Didier Drogba, en liðið verður að vinna í dag til að eiga möguleika á að komast upp úr þessum ógnarsterka riðli. Leikurinn hefst klukkan 16 og verður að sjálfssögðu í beinni á Sýn.

Zlatan tæpur fyrir leikinn gegn Englendingum

Mikil óvissa ríkir um það hvort framherjinn sterki Zlatan Ibrahimovic geti spilað lokaleik Svía í riðlakeppninni á HM þar sem sænska liðið mætir Englendingum. Zlatan tognaði á nára í upphitun fyrir leikinn gegn Paragvæ en spilaði hálfan leikinn engu að síður. Læknar sænska vonast til að fá niðurstöðu í málið í dag, en segja að meiðslin gætu jafnað sig á 24 tímum - en í versta falli á tveimur vikum.

Tango nuevo

Hér er enn einn snilldarleikurinn, Argentína, hvað er hægt að segja við svona sýningu, ljóðrænni, töfrandi fegurð einsog í útsetningu Astor Piazzolla á gamla argentíska tangóinum, þetta er hinn nýi tangó í fótboltanum, hinn hreini tónn. Ég fann sömu tilfinningu og þegar ég horfði á Spánverjana í fyrsta leik, þetta eru töfrar, auðvitað er fótbolti líka barátta, taktík og allt það, en þetta er hrein snilld, ekkert minna.

Argentínumenn rótburstuðu Serba

Argentínumenn sýndu úr hverju þeir eru gerðir á HM í dag þegar liðið valtaði yfir Serba og Svartfellinga 6-0 í viðureign liðanna í C-riðli og ljóst að ekkert lið verður öfundsvert af því að mæta Suður-Ameríkuliðinu í framhaldinu.

Við eigum ekki möguleika á titlinum

Steven Gerrard, fyrirliði Liverpool og leikmaður enska landsliðsins, viðurkennir að liðið eigi ekki nokkurn möguleika á að verða heimsmeistari ef það spilar ekki betur en það hefur gert hingað til í keppninni.

Cisse fer að láni til Marseille

Franska dagblaðið L´Equipe greindi frá því í dag að Liverpool hafi samþykkt að lána franska framherjann Djibril Cisse til liðs Marseille í heimalandi hans út næstu leiktíð. Cisse fótbrotnaði á dögunum og er ekki væntanlegur í slaginn aftur fyrr en í fyrsta lagi eftir um fimm mánuði.

Vinsæll hjá samkynhneigðum í Hollandi

Cristiano Ronaldo, landsliðsmaður Portúgal hefur verið valinn af samtökum samkynhneigðra í Hollandi fallegasti og mest kynæsandi leikmaðurinn á HM. Þetta er ekki í fyrsta skipti sem samkynhneigðir velja nafnbót á leikmanninn en hann er sagður mjög vinsæll meðal homma og hefur tekið við hlutverki David Beckham.

Argentínumenn að valta yfir Serba

Argentínumenn eru að sýna sínar bestu hliðar í leik sínum gegn Serbum og Svartfellingum í C-riðli og staðan er orðin 3-0 fyrir Argentínu þegar flautað hefur verið til leikhlés. Maxi Rodrigues hefur skorað tvívegis og varamaðurinn Esteban Cambiasso hefur skorað eitt mark.

Blikarnir hafa tapað flestum stigum

Nýliðar Breiðabliks töpuðu niður forskoti fjórða leikinn í röð í Landsbankadeild karla á Akranesi í gær og eru það lið í deildinni sem hefur tapað langflestum stigum í fyrstu sjö umferðunum. Að tapa stigum telst það þegar lið tapa eða gera jafntefli í leikjum sem þau hafa haft forustu í. Grindvíkingar koma þeim næstir en þeir eru líka það lið sem hefur unnið sér inn flest stig eftir að hafa verið undir í leikjum sínum.

Willum Þór ósigraður í Grindavík

Willum Þór Þórssyni hefur gengið vel með sín lið þegar hann hefur heimsótt Grindvíkinga þótt ekki hafi Valsmönnum tekist að koma með öll stigin heim úr leik sínum þar í gær. Þetta var sjötti leikur liðs undir stjórn Willums Þór á Grindavíkurvelli og hans lið hafa náð í 14 af 18 stigum í boði eða 78% stiganna. Markatalan er, 7-2, liðum Willums í vil.

Van Basten segir fjölmiðla blása sögur upp

Marco van Basten, þjálfari hollenska landsliðsins segir að fjölmiðlar hafi blásið upp og búið til sögur um að Arjen Robben og Robin van Persie hafi lent saman eftir leikinn gegn Serbíu. Van Basten segir þetta vera rangt.

Owen á von að vera settur á bekkinn

Micheal Owen, leikmaður enska landsliðsins segir að hann eigi allt eins von á því að verma bekkinn í síðasta leiknum í riðlakeppninni en þá leikur England gegn Svíum.

HM leikir dagsins:

Þrír leikir eru á dagskrá á HM í dag en nú er vika liðin af mótinu. Þeir leikir sem þegar hafa verið leiknir lofa mjög góðu fyrir framhaldið. Argentína og Serbía mætast klukkan 13.00 og verður þetta án efa mjög harður og spennandi leikur, enda báðar þjóðir þekktar fyrir hörku og meiri hörku.